Өрөспүүбүлүкэ салалтата сылгыны үөрдээн иитиигэ улахан болҕомтотун уурар. Былырыын күһүн Ил Дархан “Саха өрөспүүбүлүкэтигэр сылгы иитиитин сайыннарар дьаһаллар тустарынан” ыйааҕа тахсыбыта.
Раиса Сибирякова, “Саха сирэ” хаһыат, www.edersaas.ru
Ааспыт саас ыытыллыбыт өрөспүүбүлүкэ сылгыһыттарын бастакы сийиэстэригэр кэлэр биэс сыл устата ыраах учаастактарга сылгы базатын тутууга биирдии мөлүйүөн солкуобай субсидия көрүллэрин туһунан этиллибитэ. Онон, быйыл сүүс сылгы базатын тутууга 100 мөл. солк. көрүлүннэ.
Тыа хаһаайыстыбатын уонна ас-үөл бэлиитикэтин министиэристибэтин сүөһүнү иитиигэ уонна племенной үлэҕэ департаменын салайааччы Артем Александров:
—— Сылгы базатын тутууга субсидия ылааччылары талыы бастакы түһүмэҕэ кулун тутарга буолбута, — — Иккис түһүмэх ыам ыйын 15—23 күннэригэр ыытылынна. Санатан эттэххэ, 2007 сылтан 435 сылгы базата тутуллубута, ол эрээри, ити тиийбэт. Сылгыбыт ахсаана эбиллэр, сыл саҕаланыытыгар 180 тыһ. 735 сылгы баара бэлиэтэммитэ. Бачча сылгыны ыраах учаастактарга тутарга өссө 764 база наада. Былырыын сылгы салаатыгар 286 мөл. солк., ол иһигэр өрөспүүбүлүкэттэн 128 мөл. солк., федеральнай бүддьүөттэн 158 мөл. солк. көрүллүбүтэ. Быйыл үбүлээһин лаппа элбэтилиннэ: 416 мөл. солк. бэриллэр буолла. Бу иһигэр федерацияттан, «Саҥа саҕалыыр фермер» бырагыраама грана аччатыллыбытын түмүгэр, 83 мөл. солк. кэлиэҕэ, оттон өрөспүүбүлүкэ бүддьүөтүттэн 332,7 мөл. солк. бэриллиэҕэ.
Раиса Сибирякова, “Саха сирэ” хаһыат, www.edersaas.ru