Өлүөнэ уҥуор пассажирдары 1000 солк. таһыахтаах урбаанньыт сүтэн хаалла
Дьокуускай – Аллараа Бэстээх хайысхатынан пассажирдары 1000 солк. таһыахтаах урбаанньыты айанньыттар кэтэспиттэрэ хаһыс да күнүгэр барда.
Бу саас СӨ Сыана бэлиитикэтин судаарыстыбаннай кэмитиэтэ сымнаҕас сыттыктаах суудуналарга, судургутук эттэххэ, «Ирбискэ» сыананы 1000 солк. олохтообута. Ол эрээри урбаанньыттар бу тарыыбы утаран, билигин номнуо сыаналарын 2000 солк. диэри үрдэттилэр. Оттон бу күһүн СӨ тырааныспарын уонна суол хаһаайыстыбатын миниистиэристибэтэ сааскы уонна күһүҥҥү өттүгэр пассажирдары бигэргэтиллибит сыананан таһыыга биир урбаанньыты булбуттарын туһунан иһитиннэрбитэ. «Лена-транс» диэн тэрилтэлээх урбаанньыт хаһан үлэҕэ тахсарын билээри туһааннаах министиэристибэ уу суолун тырааныспарын салаатын начаалынньыга Семен Коркины кытары кэпсэтэ сылдьыбыппар: «Ыксаамаҥ! Билигин Өрүс регистрыттан докумуоннарын хомуйа сылдьар. Силигэ ситтэҕинэ үлэлии тахсыахтаах. Кини билигин түөрт суудунаны үлэлэтэр былааннаах», – диэтэ.
Ол урбаанньыппыт хаһан тахсара, арааһа, остуоруйа дойдута быһыылаах. Бу сааһы быһа тырааныспар министиэристибэтэ үөскээбит кыһалҕаны быһаарыах буолбута. Эмиэ кыһыҥҥы суол турарын кэтэһэллэр дуу?
Хаартыска: интэриниэттэн.
Анивера Акимова, «Саха сирэ» хаһыат, edersaas.ru