Тэлэбиисэр сериалларыгар, биэриилэригэр тапталлаахтарга сыһыаннаах бөрүкүтэ суох быһылааннары бэркиһии, дьулайа, ардыгар сүөлүргүү да көрөбүт. Онтубут бэйэлээх бэйэбит тыабыт сиригэр, аттыбытыгар оннооҕор буолуох дьыалалар оҥоһуллаллар эбит.
Ол курдук, Сунтаар улууһугар ханна да үлэлээбэт 24 саастаах уолга суут бириигэбэрэ таҕыста. Туох буруйу оҥорбутун иһин?
Суут быһаарбытынан, бу эдэр киһи 17 саастаах кыыһы кытта көрсүһэр эрэ буолбакка, өссө санаатаҕын аайы кырбыыр адьынаттаах эбит. Бу дьыл муус устар ыйыгар эмиэ оннук кырбаан баран, кыыс этэ-сиинэ көҕөрбүтүн кистээри, дьиэтигэр хаайан кэбиспит.
Кыыс биир түгэҥҥэ түннүгү аһан, ааһан иһэр дьахтарга кинини хаайбыттарын, ону суһаллык полицияҕа тыллыырыгар көрдөспүт.
Суут мунньаҕар сууттанааччы буруйун ончу билиммэтэх.
Ол да буоллар, оҥорбут дьыалата барыта толору дакаастанан, суут кинини РФ Холуобунай кодексатын 117-с ыст. 2-с чааһын «г» пуунунан (сокуоннай сааһын ситэ илик оҕону куруук кырбаан, этин-хаанын эчэтэн уонна уйулҕатыгар охсууну оҥорон муҥнааһыҥҥа) уонна 127-с ыст. 2-с чааһын «д» пуунунан (сокуоннай сааһын туола илик киһини уорбакка эрэ кини көҥүлүн сокуоннайа суохтук быһыыга) буруйдааҕынан билинэн, 6 сылга көҥүлүн быһары усулуобунайынан ааҕан, 4 сыл тургутар болдьоххо уурда.
Ол эбэтэр, судургу тылынан быһаардахха, 4 сыл иһигэр буруйу оҥордоҕуна, 6 сылга күлүүстээх хаайыыга барар.
Бириигэбэр сокуоннай күүһүгэр киирэ илик, өрүттэр ааһыаныахтарын сөп диэн СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.