Бу күннэргэ Дьокуускай куорат өссө биир саҥа, үс мэндиэмэннээх, үөрэх аныгы ирдэбилигэр толору эппиэттиир 18-с №-дээх оскуола дьиэтэ үөрүүлээх быһыыга-майгыга аанын аста.
Людмила Попова, “Саха сирэ” хаһыат, https://edersaas.ru/
Урутаан эттэххэ, куорат олохтоохторо тустаах оскуола саҥа дьиэҕэ көһөрүн уһун кэм устата кэтэстилэр. Онон үөрэнээччилэр, учууталлар, төрөппүттэр үөрүүлэрин ааҕан ситиллибэт.
Оскуоланы арыйыы үөрүүлээх тэрээһинигэр СӨ Ил Дархана Егор Борисов, Дьокуускай куорат баһылыга Айсен Николаев, СӨ үөрэҕин уонна наукатын миниистирэ Владимир Егоров, СӨ архитектуратын уонна тутуу комплексын миниистирэ Вера Кузакова, үөрэнээччилэр, оскуола коллектива, төрөппүттэр кыттыннылар.
350 миэстэлээх саҥа дьэндэйбит оскуола бастакы этээһин киэҥ-куоҥ хосторугар алын сүһүөх кылаас оҕолоро үөрэниэхтэрэ. Итиэннэ технология, уруһуй биридимиэттэрин хосторо, остолобуой, сыгынньахтанар хос бааллар. Иккис этээскэ саала, оҕолор үөрэнэр, стоматолог, медик, лаборатория-кылааһын хосторо олохтоммуттар. Үһүс этээскэ психолог, психологическай анал сынньанар, муусука уруогун хосторо буоллаллар эбит.
Быйыл оскуола 60 сыллаах үбүлүөйүн бэлиэтиэҕэ. Онон бэйэтэ туспа бэлэх буолар. Арассыыйа үрдүнэн оскуола үөрэнээччилэрин биир симиэнэҕэ көһөрүү үлэтэ бара турар. Тустаах оскуола ол бырагыраамытын чэрчитинэн тутулунна. Ол курдук, ааспыт сылга дойду бүддьүөтүттэн көрүллүбүт сууматтан 255 432,1 тыһ солк Дьокуускай куорат 18-с №-дээх оскуолатын тутуутугар барбыта.
Ил Дархан кэлиҥҥи сылларга киһи хараҕар көстөр уларыйыылар барбыттарын бэлиэтээн туран: “Уонча сыллааҕыны кытта билиҥҥи кэми тэҥнээн көрдөххө, Дьокуускай куорат тупсубута тута көстөр. Саҥа социальнай объектар уонна олорор дьиэлэр тутуллаллар. Ону кытта нэһилиэнньэтин ахсаана эбиллэ турар. Онон социальнай объектары, оскуолалары, оҕо саадтарын тутар сорук күүскэ турар. Биһиги бу кыһалҕалары быһаарар соруктаахпыт”, — диэн тыл этэригэр бэлиэтээтэ.
“Дойду уонна өрөспүүбүлүкэ таһымнаах быһаарыы ылыллан, биһиги оҕолорбут аныгы ирдэбилгэ эппиэттиир саҥа оскуолаҕа үөрэнэр кыахтаннылар. Бүгүҥҥү күҥҥэ 18-с оскуолаҕа 383 оҕо үөрэнэр. Саҥа тутуу үлэҕэ киириитэ, кинилэр биир симинэнэн үөрэнэллэрин хааччыйыаҕа. Оҕолор хаачыстыбалаах билиини иҥэринэллэригэр эрэллээхпин”, — диэн Айсен Николаев эттэ.
Ити курдук, оҕолор 1968 сыллааҕы мас тутууттан саҥа оскуолаҕа көһөн, үөрүүлэрэ улахан. Букатын дыбарыаска киирбит курдук сананаллар. Санатан эттэххэ, бу Дьокуускай куорат бүтэһик мас оскуолата этэ. Онон бэйэтэ туспа историяҕа киирэр уратылаах. Эргэ оскуола манна үөрэммит оҕолорго үтүө эрэ өйдөбүлү хаалларарыгар, онтон саҥа оскуола киэҥ билиини, сырдыгы эрэ иҥэрэригэр эрэнэбит.
Людмила Попова, “Саха сирэ” хаһыат, https://edersaas.ru/