close

19 саастаах кыргыттар: биирэ — уоруйах, иккиһэ — кырбый...
Бэрээдэк - Олох-дьаһах

19 саастаах кыргыттар: биирэ — уоруйах, иккиһэ — кырбый

Эдэр эрдэххэ, уолуттан-кыыһыттан тутулуга суох уолҕамдьытык быһыыланыы баар бөҕө буоллаҕа. Ол эрээри, куһаҕаны өйдүү-өйдүү соруйан оҥоруу диэн атын. 

edersaas.ru

Дьокуускай куорат полициятыгар биир дьахтар сайабылыанньа киллэрбит. Кыһыл көмүс киэргэллэрин уорбуттарын туһунан. Дьахтар быһаарбытынан, киэргэллэрин биирдэ эмит кэтэр буолан, шкатулкатын хам-түм эрэ аһан көрөр эбит.

Оттон кэлин өйдөөн көрбүтэ — киэргэллэрэ хайдах эрэ аҕыйаабыт курдуктар эбит, буолаары буолан, ыарахан сыаналаах көмүс оҥоһуктара сүппүттэр. Уопсайа 60 тыһ. солк. тахса суумалаах хоромньу тахсыбыт.

Полиция оперативниктара уорууга уорбаланааччы быһыытынан, 19 саастаах кыыһы туппуттар.

Бу кыыс дьахтар уолугар ыалдьыттыы кэлэр доҕотторун-атастарын ортотугар баар эбит. Уонна балаҕан ыйыттан саҕалаан, ол кэллэҕин аайы шкатулкаттан киэргэллэри сойбото сылдьыбыт.

Полицейскайдар уоруйах кыыс ол көмүс оҥоһуктары ханна батарар сирин билбиттэр уонна ол киэргэллэри булан, сокуоннай хаһаайкатыгар төннөрөргө үлэлэһэллэр.

Бу чахчынан «уоруу» ыстатыйанан холуобунай дьыала тэриллибит.

Эмиэ Дьокуускайга аны түүҥҥү баарга эмиэ 19 саастаах кыыс полиция хараҕын далыгар түбэспит.

Бу кыыс уонна икки эдэр дьахтар этиһэн турбуттар эрээри, сотору уоскуйбут курдук буолбуттар.

Ол эрэн, тарҕаһыы саҕаламмытыгар, номнуо итирбит кыыс таҥас устар сир таһыгар дьахталлартан биирдэстэрин көрөн, ыыс-бурут тылларынан үөхсээт, өр толкуйдуу барбакка, дьахтары хаста да сирэйгэ охсубут. Ол охсууттан анараата өйүн сүтэрбит.

«Боевик»-кыыс аны таһырдьа кирилиэскэ иккис дьахтары көрбүт уонна атахха тэбэн, охторон түһэрбит.

Бу чахчынан РФ Холуобунай кодексатын 112-с ыст. 1 чааһынан, ол эбэтэр, киһи доруобуйатыгар орто ыарахан эмсэҕэлээһини соруйан оҥоруу бэлиэтэ баарынан, дьыала тэриллибит.

Бу туһунан СӨ ИДьМ-тын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

#бүгүн: 12
1
0

Сайт матырыйаалларын ааптар көҥүлэ суох ылар бобуллар.