Билигин сонун олус түргэнник тарҕанар. Бассаап, фэйсбук, инстаграм туола түһэр. Бүгүн эһиги дьүүлгүтүгэр сыл устата саамай биллибит, интернеккэ “былааһы ылбыт” түгэннэри edersaas.ru мустубут. 
Казахстан вайнердара
Туймаада ыһыаҕын саҕана нууччалыы тыллаах дойдуларга аатырар вайнердар – Казахстантан Нурлан Батыров – “Безумная женщина”, Кыргызстантан Эльдана Сатыбалдиева, “Queex” бөлөх уолаттара Дьокуускайга кэлэ сылдьыбыттара. Кинилэр “Insta-vine fest” норуоттар икки ардыларынааҕы вайнердар бэстибээллэригэр кыттыбыттара. Бу дьон Инстаграмҥа сүүһүнэн тыһыынча көрөөччүлээхтэр. Омук вайнердара Саха сирин вайнердарын кытта доҕордоһон, билигин даҕаны видеолары бииргэ усталлар.
Уруһуй хаастаах Анжелика
Социальнай ситим лиэнтэтэ бу күһүҥҥүттэн хойуу уруһуй хаастаах Анжелика Протодьяконова хаартыскатынан, видеотунан туолбута. Эмискэ “сулус” буолбут кыыһы сорох дьон үөхтэ, үгүстэрэ хайҕаата. Кинини оптуобуска олордоҕуна ким эрэ күлүү гынан хаартыскаҕа түһэрэн бассаап нөҥүө тарҕаппытыттан ыла олоҕо тосту уларыйда. Анжелика көнө майгылаах, киэҥ көҕүстээх буолан күлүү гынан ыыппыт хаартыскаларын туһанан “сулус” буолан “тырымнаата”. Кыыспыт быйыл “Мисс Виртуальная Якутия” куонкуруска кытынна, араас тэрилтэлэргэ Instagram нөҥүө реклама оҥорор. Кинини кытта хаартыскаҕа түһүү – 100 солк. Бассаап — аныгы этэрбэс араадьыйата
Ди Каприоҕа саха “Оскара”
Артыыс 1997 сыллаахха “Титаник” киинэҕэ уһуллан аатырыаҕыттан бу тухары “Оскар” наҕараадаҕа тиксибэтэҕэ күлүүгэ сылдьара. Сүүрбэ сыл ааспытын эрэ кэнниттэн, быйыл, “Выживший” киинэҕэ Лео сүрүн оруолу толорон, дьэ, күүтүүлээх наҕараадатын ылла. Саха сирин кэрэ куоларын аатыттан үрүҥ көмүстэн кутуллан оҥоһуллубут чороон тутурдаах “Эллэй” диэн ааттаах статуэтканы Ди Каприоҕа Лос-Анджелестааҕы офиһыгар тиэрдибиттэрэ. Акция “Оскар для Лео” диэн ааттаммытта. Тэрийээччилэр быйыл норуодунай Оскары эмиэ биир эмит артыыска биэрэр санаалаахтар.
L`ONE “Якутяночка” килиибэ
Саха сириттэн төрүттээх Арассыыйа биллэр рэп ырыаһыта LONE быйылгы “Азия оҕолоро” оонньуу гимнэ буолбут “Якутяночка” ырыаҕа Варвара Визборы кытта устубут килиибэ былааһы ылла. Килииби устуу бүддьүөтэ 1 мөл. солк. тэҥнэспитэ. Леонид Дербенев тылбааһыгар, Аркадий Алексеев матыыбынан Маргарита Суворова ырыатын саҥалыын тыыннаан биэрбитин үгүс киһи хайҕаата. Ырыа тылын-өһүн, килиипкэ баар үҥкүүнү, таҥаһы-сабы сиилээччилэр даҕаны көстүбүттэрэ.
“Snapchat” сыһыарыы
Селфилыырга аналлаах бырагыраамма. Бу сыһыарыы үгүс киһи төлөпүөнүгэр баар. Сыһыарыы көмөтүнэн араас кыыл-сүөл, айылҕа көстүүтэ буолан, сирэйгин уларытан хаартыскаҕа түһүөххүн, куоласкын уларытан видео устуоххун сөп. Инстаграм лиэнтэтэ бу бырагыраамма көмөтүнэн сиэлпилээбит дьон хаартыскатынан туолбута. Сыл бүтүүтэ “Snapchat”-ынан үлүһүйүү уҕараата.
«Pokemon GO» оонньуу
Улахан айдааны таһаара сыспыт оонньуу диэххэ сөп. Судургутук быһаардахха, куорат устун хаама сылдьан покемоннары тутаҕын. Сыһыарыы Арассыыйа хайа баҕарар куоратыгар үлэлиир кыахтаах. Туппут покемоҥҥунан атын оонньооччулары кытары охсуһаҕын, сэдэх көрүҥнээхтэри атыылыыгын. Ый устата эмискэ улахан биһирэбили ылбыта. Онно-манна: “Оҕолор покемон тутаары массыына анныгар киирэн биэрбиттэр үһү” диэн дьулаан кэпсээннэр иһиллибиттэрэ. Кэлин сыһыарыы аймалҕана ааста, оонньооччу ахсаана аҕыйаата.
Минньигэс миин
“Доширак” курдук түргэнник буһарыллар, бэлэм кырбастаммыт эттээх, тумалаах, лапсалаах сахалыы миини биир бакыакка уган атыылаан саҕалаабыттарын элбэх киһи биһирээтэ. Интернет ситимигэр тарҕанна. Сыаната даҕаны удамыр. “Доширак” оннугар икки аһыырыгар сөп гына буһаран, сибиэһэй эт миинин иһиэххэ сөп. “Минньигэс мини” атыылаһан устудьуон аймах абыраныыһы. Сүрүннээн суол сабылыбыт кэмигэр эт кэлиэр диэри туһалыаҕа.
Станислав ИОВЛЕВ бэлэмнээтэ, edersaas.ru