«Бүлүү» федеральнай массыына суолун управлениета иһитиннэрэринэн, 2018 с. алтынньы 17 күнүттэн Үөһээ Бүлүү уонна Ньурба улууһун кыраныыссатыгар Түүкээн өрүһү туоруур понтуон муоста сабылынна.
edersaas.ru
Алтынньы 11 күнүттэн Сунтаар уонна Мииринэй улууһун кыраныыссатыгар Оччугуй Ботуобуйаны туоруур муостанан сырыы эмиэ тохтоото.
Муус туран, кыһыҥҥы суол аһыллыар диэри бу диэки массыына сырыыта түмүктэннэ.
«Бүлүү» федеральнай массыына суолун управлениета быйыл А-331 Бүлүү федеральнай суолун 702 уонна 1151 км Түүкээн уонна Оччугуй Ботуобуйа өрүһү туоруур муостаны тутарга күрэх биллэрбитэ. Хас биирдии эбийиэккэ генеральнай бэдэрээтчит ананна.
Түүкээн нөҥүө 267 погоннай миэтэрэлээх, Оччугуй Ботуобуйаҕа 191 м. уһуннаах муоста 2020 с. төрдүс кыбаарталыгар тутуллан бүтэрэ былааҥҥа киирдэ.
Онон, Бүлүү бөлөх улуустарыгар, чуолаан, Ньурбаҕа, Сунтаарга, Мииринэйгэ айан хаайтарыыта суох төгүрүк сыл аһаҕас буолуоҕа, массыыналар дьыл кэмиттэн иҥнибэккэ айанныахтара.
Марианна Тыртыкова, «Саха сирэ», edersaas.ru