Аан дойдутааҕы ыччат бэстибээлин чэрчитинэн, норуоттар икки ардыларынааҕы киинэ форума ыытылла турар. Ол курдук, Саха Өрөспүүбүлүкэтин дэлэгээссийэтэ «24 снега» диэн Михаил Барынин устубут киинэтин көрдөрүөҕэ.
edersaas.ru
Саха артыыстара Степан Порядин, Гаврил Менкяров, Валентин Макаров итиэннэ звукорежиссер Анатолий Яковлев, режиссер Алексей Амбросьев киинэни билиһиннэриэхтэрэ.
Алексей Амбросьев, Саха Өрөспүүбүлүкэтин дэлэгээссийэтин киинэ былаһааккатын бэрэстэбиитэлэ:
— Аан дойдутааҕы ыччат бэстибээлигэр «24 снега» киинэни эрэ буолбакка, хас да сахалыы киинэни билиһиннэрээри гыммыппыт. Эрдэ сайаапка ыытыллыбыта. Аан дойду киинэ устааччылара олус элбэх сайаапка түһэрэннэр, биирдии эрэ киинэни көрдөрөрү көҥүллээбиттэрэ. Сочига кэлээт, иккиһин сайаапка түһэрбиппит. Эппиэтин күүтэбит. Ыччат бэстибээлиттэн олус элбэҕи күүтэбин. Ол курдук элбэх саҥа билсиһиини, доҕоттору, уопуту үллэстээһини. Сүрүннээн, тас дойдулар киинэни устар ньымаларын билиэхпин баҕарабын.
Санатан эттэххэ, аан дойдутааҕы ыччат бэстибээлэ Сочи куоракка алтынньы 14 күнүттэн саҕалаан ыытылла турар.
Николай Попов, «Саха сирэ» хаһыат, edersaas.ru