РФ күнү-дьылы кэтээн көрөр кииниттэн лаборатория сэбиэдиссэйэ Людмила Паршина «Российская газета» эрэдээксийэтигэр, 25 сыл буолан баран сылаас кыһын хатыланарын туһунан иһитиннэрбит. Бу туһунан интэриниэккэ суруйаллар.
Быйылгы курдук сылаас Бокуруоп 1993 уонна 1967 сыллардаахха буолбута үһү. Истэ охсуоҕу тиэтэйэр буоллахха, алтынньыга күн-дьыл сылаас туруута 50 сылга биирдэ хатыланар эбит.
—1993 с. сылаас Бокуруобу сылаас кыһын салҕаабыта, — диэбит Паршина уонна соҕуруу тымныылара биир эрэ кыраадыс буола сылдьыбытын бэлиэтээбит. Маныаха күн-дьыл кимтэн да, туохтан да тутулуктаммакка, хайдах талбытынан уларыйарын этэн туран, 1967 сыллааҕы сылаас күһүнү тымныы кыһын солбуйбутун ыйбыт.
Интэриниэккэ суруйбуттарынан, билиҥҥитэ күн-дьыл туруга чуумпу, сылаас курдук. Балаҕан ыйын санатар дииллэр. Арай, сарсыарда хаһыҥнааҕа уонна туманнааҕа эрэ кыһын кэлбитин, алтынньы ортото буолбутун өйдөтөр диэн суруйаллар.
Үйэ чиэппэрэ буолан баран хатыланар сылаас кыһын биһиги Сахабыт сиригэр дьайыа дуо? Күнү-дьылы кэтээн көрөөччүлэр, билгэһиттэр туох дииллэрэ буолла?
Хаартыска: интэриниэттэн