«Сахамедиа» хампаанньа Дьокуускай куорат 2-с №-дээх оскуолатын кытары сөбүлэһии түһэристэ
Бүгүн, атырдьах ыйын 20 күнүгэр, Өрөспүүбүлүкэтээҕи медиа-кииҥҥэ «Сахамедиа» хампаанньа Дьокуускай куорат 2-с №-дээх оскуолатын кытта бииргэ үлэлиир туһунан сөбүлэһии түһэристэ.
Тэрээһиҥҥэ 2-с №-дээх оскуола дириэктэрэ Алексей Семенов, оскуола үөрэнээччилэрэ, «Сахамедиа» генеральнай дириэктэрэ Алексей Чертков, дириэктэри солбуйааччы Афанасий Ноев уо.д.а. кыттыыны ыллылар.
Дьокуускай куорат 2-с №-дээх оскуолатын дириэктэрэ Алексей Семенов: «Былырыыҥҥыттан оскуолабытыгар профессиональнай таһымнаах медиа-устуудьуйа тэрийэн үлэлэтэбит. Манна оҕолор бэйэлэрин суруналыыс быһыытынан холонон көрөллөр — хаартыскаҕа түһэрэллэр, видеоҕа усталлар, матырыйаал суруйаллар, биэриилэри ыыталлар. Үөрэнээччилэрбит күннэтэ оскуолаҕа туох интэриэһинэй буоларын сырдата тураллар. Онтон «Сахамедианы» кытта бииргэ үлэлэстэхпитинэ, сонуннарбытын оскуолабыт иһинэн эрэ буолбакка, өрөспүүбүлүкэни биир гына тарҕатар кыахтанабыт. Маны таһынан, биир сүрүн сорукпутунан саха тылын сахалыы суруналыыстыка нөҥүө сайыннарыы, билии-көрүү буолар. Оҕолор саха тылынан оҥорбут матырыйаалларынан биир саастаахтарын уһуйуохтара,» — диэн санаатын үллэстэр.
Оттон «Сахамедиа» генеральнай дириэктэрэ Алексей Чертков: «Биһиги маннык ис хоһоонноох сөбүлэһиини түһэрсэн олус үөрдүбүт. Бу оскуолаҕа медиа-устуудьуйа үлэлиир, онон үөрэнээччилэр хаачыстыбалаахтык үлэлэһэр кыахтаахтар. Үгүс былааннаах айар бөлөх улахан бырайыактары оҥоруоҕа диэн эрэнэбит. Оҕолор көмөлөрүнэн ыччакка аналлаах контеммытын сайыннарыахпыт,» — диэн түмүк тылы этэн, сөбүлэһиигэ илии баттаатылар.
Айтана Аммосова, edersaas.ru
Денис Попов хаартыскаҕа түһэриилэрэ.