33 тыһ. 587 туонна үүт туттарылынна

Ааптар: 
Бөлөххө киир:

Тыа хаһаайыстыбатын уонна ас-үөл бэлиитикэтин министиэристибэтэ иһитиннэрэринэн, от ыйын 20 күнүн туругунан, өрөспүүбүлүкэ үрдүнэн 33 тыһ. 587 туонна үүт соҕотуопкаланна.

edersaas.ru


Киилэ үүт сыаната субсидияны кытары холбоон, ортотунан 35 солк. буолан, хаһаайыстыбалар үүтү туттарыыга интэриэстэрэ улахан. Ордук элбэх үүтү Мэҥэ Хаҥалас (3 тыһ. 405 т.), Сунтаар (3 тыһ. 459 т.), Чурапчы (3 тыһ. 399 т.), Хаҥалас (2 тыһ. 791 т.), Таатта (2 тыһ. 552 т.) туттаран иһэллэр. Хотугу улуустартан дьааҥылар көрдөрүүлэрэ үчүгэй, сыл саҕаланыаҕыттан 1 тыһ. 420 т үүтү соҕотуопкалаатылар. Оттон Абый, Орто Халыма улуустарыгар халаан тэбиититтэн үүтү туттарыы үлэтэ кэһиллэн хаалла.

Киин, илин эҥээр уонна Бүлүү сорох улуустарыгар кураан сайын буолбута үүтү ыаһыҥҥа охсоро чахчы. Ол иһин, хаһаайыстыбалар «улахан үүт» кэмин өрүсүһэн, былааннарын толорор туһугар бары күүстэрин уураллар.

«Саха сиригэр оҥоһулунна» бырайыак иккис түһүмэҕэ 

Киин куоракка супер-маркетыттан саҕалаан дьоҕус лааппыга тиийэ 1,5 тыһ. маҕаһыын баарыттан 15 бырыһыаннара эрэ олохтоох аһы-үөлү атыылыыр. Оттон улуустардааҕы астыыр-таҥастыыр кэпэрэтииптэр бородууксуйаларын куоракка улахан сыранан, бэйэлэрэ кыра чуолҕан арыйан эбэтэр «Сахаагропродукт» өрөспүүбүлүкэтээҕи кэпэрэтиип нөҥүө батара сатыыллар. Тыа сүөгэйэ, үүтэ-этэ атыыланар сирэ аҕыйах буолан, куорат дьоно дэбигис тииһиммэттэр. 

Ити иһин Тыа хаһаайыстыбатын уонна ас-үөл бэлиитикэтин министиэристибэтэ быйыл «Саха сиригэр оҥоһулунна» бырайыагы саҕалаата. Бэс ыйын 1 күнүгэр «Айгуль», «Алмаз» эргиэн кииннэрин, «Мозаика» маҕаһыын салалталарын кытары бииргэ үлэлииргэ дуогабар түһэрсибитэ. Ол түмүгэр ити маҕаһыыннарга «Саха сиригэр оҥоһулунна» логотиптаах витриналар, тоҥорор ыскааптар туруоруллан, улуустартан киирэр үрүҥ ас, эт, эттэн оҥоһук уо.д.а. атыыланар буолла. «Мозаика» бэрэстэбиитэлэ Надежда Андрюшина этэринэн, олохтоох аһы-үөлү атыылааһын 58 % үрдээбит, бородууксуйаны хааччыйааччы ахсаана икки төгүл элбээн, 38-ка тиийбит.

Бырайыак иккис түһүмэҕэ саҕаланна: миниистири солбуйааччы Семен Потапов тоҕус маҕаһыын хаһаайынын кытары илии баттаста. Ити курдук, олохтоох аһы-үөлү батарар эргиэн тэрилтэлэрэ элбээн иһэллэр. Ол барыта уот кураантан, уу суттан иҥнибэккэ сүөһүнү-сылгыны иитэн сыралаһар тыа дьонугар дохуот буолан тиийиэҕэ.

Раиса СИБИРЯКОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0