От ыйын 9-15 күннэригэр, Дьокуускай куоракка норуоттар икки ардыларынааҕы интеллектуальнай оонньуулар ыытыллаллар. Бу улахан тэрээһин чэрчитинэн, бүгүн М.К. Аммосов аатынан ХИФУ естественнай наукалар факультеттарын куорпуһугар, компьютерынан араас сапчаастары 3D моделларын оҥорууга күрэхтэһии саҕаланна. Манна Арассыыйа хамаандаларын таһынан Казахстан хамаандата кыттар.
Игорь Иванов, эксперт:
— 3D-моделирование күрэхтэһиитигэр 44 оҕо кытта сылдьар. Бэҕэһээ сэрэбиэй тардыыта уонна үлэлиир миэстэни бэлэмнээһин буолбута. Бүгүн — күрэхтэһии бастакы күнэ. Кыттааччылар элбэх хайысхаҕа туһаныллар үстүрүмүөн оҥорон таһаарыахтаахтар. Холобура, оҥорор үстүрүмүөн иһигэр алта муннуктаах буолта, гаайканы эрийэр күлүүстэр, чыскылар уонна этибиэркэ баар буолуохтаахтар. Бу үстүрүмүөннэринэн 3D-принтеры киһи сатаан өрөмүөннүүр буолуохтаах. От ыйын 12 күнүгэр түмүк таһаарыыта буолуоҕа. Түмүккэ икки номинацияны (тиэхиньикэ моделированиета уонна уус-уран моделирование) уонна муҥутуур кыайыылааҕы быһаарыахпыт.
Алина Иванова, кыттааччы:
— Күрэхтэһии үчүгэйдик баран иһэр. Сорудаҕы толорорго 8 чаас биэрдилэр, ол иһин киһи холкутук толкуйдаан оҥорор кыахтаах. Улаханнык долгуйбакка сорудахпын толоро сылдьабын. Инники миэстэҕэ наһаа санаммаппын, аҥардас кыттар даҕаны үчүгэй.
Сарсыҥҥы түһүмэххэ уус-уран моделирование күрэхтэһиитэ буолар. Икки күн түмүгүнэн муҥутуур кыайыылааҕы быһаарыахтара.
Николай Попов, «Саха сирэ» хаһыат, edersaas.ru