2018 сыл муус устар 1 күнүнээҕи туругунан (статистика, прокуратура уонна үлэ инспекциятын сибидиэнньэлэринэн), Саха Өрөспүүбүлүкэтин 40 тэрилтэтигэр хамнаска 152 мөлүйүөн суумалаах иэс үөскээтэ.
edersaas.ru
Бу туһунан СӨ үлэҕэ уонна социальнай сайдыыга миниистир э.т. Елена Волкова үс өрүттээх хамыыһыйа мунньаҕар иһитиннэрдэ. Социальнай-үлэ сыһыаннарын бэрээдэктээһиҥҥэ үс өрүттээх өрөспүүбүлүкэтээҕи хамыыһыйа мунньаҕын СӨ бырабыыталыстыбатын бэрэссэдээтэлин солбуйааччы Алексей Дьячковскай салайан ыытта.
«Уһатыллыбыт иэс уопсай сууматыттан промышленность тэрилтэлэрэ – 33%, дьиэ-уот, коммунальнай хаһаайыстыба – 22%, тырааныспар уонна суол хаһаайыстыбата – 14%, тутуу комплекса – 9,6%, тыа хаһаайыстыбата – 4% ылаллар», – диэтэ Елена Волкова.
Улуустарынан ыллахха, хамнаска иэс өрөспүүбүлүкэ 13 улууһугар уонна Дьокуускай куоракка бэлиэтэнэр. Итинтэн 88 бырыһыана Дьокуускай куорат тэрилтэлэригэр уонна Нерюнгри, Ленскэй, Мииринэй курдук промышленность оройуоннарыгар тиксэр.
Елена Волкова быһаарбытынан, иэс үөскээһинин сүрүн төрүөтүнэн тэрилтэлэр үпкэ ыарахан балаһыанньалара, оҥоһуллубут өҥө иһин төлөбүрү хомуйуу аҕыйаабыта уонна сакаасчыттар оҥоһуллубут өҥө иһин төлөбүрү оҥоро охсубаттара буолар. Сүрүн кыһалҕаны моҥкурууттаабыт тэрилтэлэр үөскэтэллэр. Ити 40 иэстээх тэрилтэттэн 15-һэ моҥкурууттааһын араас түһүмэҕэр сылдьар.
Үс өрүттээх хамыыһыйа чилиэннэрэ сүрүн дакылааты уонна кыттааччылар этиилэрин истэн баран, судаарыстыбаннай былаас ситэриилээх уорганнара судаарыстыбаннай тэрилтэлэргэ уонна хаһаайыстыбаннай субъектарга хамнаска иэһи таһаарбаттарын хааччыйалларыгар этилиннэ. Моҥкуруттуур туруктаах тэрилтэлэр туруктарын, хамнас кэмигэр төлөнүүтүн уонна хойутааһынын туһунан СӨ Үлэҕэ уонна социальнай сайдыыга министиэристибэтигэр кэмигэр иһитиннэрэргэ сорудахтанна. Үс өрүттээх хамыыһыйа сорудаҕын толорууну Алексей Дьячковскай тус хонтуруолугар ылла.
Ону таһынан Саха Өрөспүүбүлүкэтигэр үлэ кэмигэр эчэйиини аҕыйаатыыга хайысхаламмыт дьаһаллары уонна агропромышленнай комплекс үлэһиттэрин санаторийга-куруорка эмтээһин боппуруостарын дьүүллэстилэр.
Надежда ЕГОРОВА, «Саха сирэ» хаһыат, edersaas.ru
Мария ВАСИЛЬЕВА хаартыскаҕа түһэриилэрэ.