Үөһээ Дьааҥы улууһугар булуллубут былыргы кулун этин М.К. Аммосов аатынан ХИФУ-га аҕалбыттара. Бүгүн, атырдьах ыйын 23 күнүгэр, Сэлии мусуойун креохранилищетыгар киэҥ араҥаҕа көрдөрдүлэр. Бу туһунан университет пресс-сулууспата иһитиннэрэр.
«Кулун этэ улахан эчэйиитэ суох. Тириитэ, түүтэ кытта баар. Маннык көстүү эриэккэс буолааччы. Кулун быһа холоон сааһа — 1 ый. Былыр, 30-40 тыһ. сыл анараа өттүгэр олорон ааспыт сылгы билиҥҥиттэн чыҥха атын«, — диир Сэлии мусуойун сэбиэдиссэйэ, биологическэй наука хандьыдаата Семен Григорьев.
Бүгүн кулун түүтүн, этин уонна уҥуоҕун ДНК анаалыска анаан ыллылар. Хоту сир экологиятын научнай-чинчийэр институтун дириэктэрэ Григорий Саввинов этэринэн, булумньу Саха сиригэр уонна аан дойдуга улахан сыаннастаах. Бастаан чинчийии бырагырааматын оҥоруохтара, онтон үлэлээн саҕалыахтара. Кулуну булбут экспедиция дьоно эппиттэринэн, кулун ууга түспүт быһыылаах. Палеонтологическэй экспедиция Баатаҕайдааҕы оҥхой сиргэ сылдьыбыт. Ол Үөһээ Дьааҥы Үнүгэн диэн сиригэр баар. Экспедиция быйыл атырдьах ыйын 9-14 күннэригэр буолбута. ХИФУ уонна Киндай японскай университет учуонайдара, Fuji TV хампаанньа үлэһиттэрэ кыттыбыттар.
Санатан эттэххэ, атырдьах ыйын 11 күнүгэр учуонайдар былыргы кулуну буллубут диэн биллэрбиттэрэ. Икки хонон баран эттээх сэлии уҥуоҕа көстүбүтэ. Бу икки булумньу Россия уонна аан дойду араас учуонайдара чинчийиилэригэр улахан суолталаах.
edersaas.ru
Мичил Яковлев хаартыскаҕа түһэриилэрэ.