Алтынньы 27-28 күннэригэр Дьокуускай куорат Комсомольскай болуоссатыгар «Саха сирин балыга-2018» быыстапка-дьаарбаҥкаҕа ас-үөл эйгэтигэр үлэлиир 25 тэрилтэ кытынна. Атыыга өрүс, күөл, муора көмүс хатырыктааҕын арааһа: чыыр, муксун, күндүөпкэ, хатыыс, тууччах, сордоҥ, собо уо.д.а таҕыста.
edersaas.ru
Сайыҥҥы-күһүҥҥү балык удамыр сыананан бэрт хамаҕатык атыыланан, 50 туонна биллибэккэ бүттэ дэһэллэр тэрийээччилэр. Дьаарбаҥкаҕа, быһа холуйан, 27 тыһ. киһи сырытта кинилэр бары туустаах, сибиэһэй, ыыһаммыт балык арааһын ыллылар, сорохтор тууһанарга диэн куулунан атыыластылар.
Быыстапканы «Долгунча» эбэҥки этно-фольклорнай ансаамбыл сиэри-туому оҥоруутунан астылар. Хоту дойду норуоттарын ырыаларын, үҥкүүлэрин көрдөрөн, бар дьону сэргэхситтилэр.
«Седьмое небо» ресторан оҥорон таһаарыытын сэбиэдиссэйэ Иван Решетников балыгы итиилии ыыһыырга маастар-кылаас көрдөрдө.
Аллайыахаттан саамай улахан 5 киилэлээх чыыр, Булуҥтан 20 кг тууччах, Кэбээйиттэн 1,5 киилэлээх собо хаһаайыттара анал бирииһинэн наҕараадаланнылар.
Тоҥ балыгы түргэнник бириэмэҕэ кыһарга Булуҥтан Павел Никитин бастакы миэстэни, иккиһи эмиэ Булуҥтан Алексей Птицын, үсүһү Усуйаанаттан Валерий Куличкин ыллылар.
Марианна Тыртыкова, edersaas.ru