Бүгүн, ахсынньы 1 күнүгэр, Хаҥалас улууһун Өктөм нэһилиэгэр «Ленскэй кыраай» форумҥа II Өрөспүүбүлүкэтээҕи «Поселение — ресурс основы Якутии» диэн эдэр баһылыктар форумнара арылынна. Форумҥа араас нэһилиэк баһылыктара кытыннылар. Тэрээһин арыллыытыгар Саха өрөспүүбүлүкэтин бырабыыталыстыбатын солбуйааччы Михаил Гуляев, Саха Өрөспүүбүлүкэтин дьиэ кэргэн бэлиитикэтин уонна ыччат дьыалатын миниистирэ Афанасий Владимиров, Саха Өрөспүүбүлүкэтин муниципальнай тэриллиилэрин сэбиэтин бэрэссэдээтэлэ, Жатай бөһүөлэгин баһылыга Михаил Кистенев кыттыыны ыллылар. edersaas.ru
Форумҥа саҥа талыллыбыт баһылыктар салайар үлэлэригэр көмө буолар лекциялар, семинардар уонна бөлөҕүнэн үлэлэр ыытыллыахтара. Маны таһынан, Саха Өрөспүүбүлүкэтин араас бырайыактарын, бырагырааммаларын уонна сокуоннарын билиһиннэриэхтэрэ. Лекциялары уонна семинардары Саха Өрөспүүбүлүкэтин миниистирдэрэ, департаменнар салайааччылара ыытыахтара.
Михаил Гуляев, Саха Өрөспүүбүлүкэтин бырабыыталыстыбатын бэрэссэдээтэлин солбуйааччы:
— Салайар үлэ тэтимэ сыл аайы уларыйар. Саҥа сокуоннар, судаарыстыбыннай бырагырааммалар ылылла тураллар. II Өрөспүүбүлүкэтээҕи «Поселение — ресурс основы Якутии» форум саҥа үлэлээн саҕалаан эрэр баһылыктарга ити уларыйыылары сырдатар уонна салайар үлэҕэ үөрэтэр соруктаах. Иккиһинэн, граннары туһанан үлэлиир хайысхаҕа улахан болҕомто ууруллар. Өрөспүүбүлүкэ уонна Арассыыйа таһымнаах элбэх граннар оонньоноллор. Ол граннары кыайар уонна сөпкө туһанар туһунан сырдатыы үлэтэ ыытыллыа. Үсүһүнэн, баһылыктар форумҥа сылдьаннар бэйэ бэйэлэрин кытта билсэллэр. Инники өттүгэр бэйэ-бэйэлэрин кытта дьүөрэлээн үлэлииллэригэр туһалаах буолар. Төрдүһүнэн, саҥа үлэлээн эрэр баһылыктар миниистирдэри, араас департаменнар салайааччыларын кытта билсэллэр уонна үлэлиир былааннарын оҥороллор.
Ивамар Соловьев, Уус Алдан Дүпсүн нэһилиэгин баһылыга:
— Мин бу форумҥа иккиһин кыттабын. Былырыын ыытыллыбыт форум үрдүк тэрээһиннээхтик ааспыта. Бу форум саҥа талыллыбыт баһылыктарга олус күүстээх көмө буолар. Миниистирдэр, бырабыыталыстыба үлэһиттэрэ, департаменнар салайааччылара кэлэн лекция ааҕаллара баһылык үлэтигэр олус туһалаах. Үксүн бырагырааммаларынан уонна бырайыактарынан үлэлэр буолаллар. Маннык тэрээһин ыытыллара олус үчүгэй.
Иван Попов, Сунтаар улууһун Тойбохой нэһилиэгин баһылыга:
— «Поселение — ресурс основы Якутии» форум саҥа үлэлээн эрэр баһылыктарга улахан көмө буолар. Хайдах үлэлээн саҕалыырбытыгар, сөптөөх быһаарыныы ылынарбытыгар күүс-көмө буолар. Өрөспүүбүлүкэбит саҥа талыллыбыт баһылыктарын кытта билсэбит, салгыы бииргэ үлэлэһиэхпит.
Николай Попов, «Саха сирэ» хаһыат, edersaas.ru