Бу сыл ааспыт 8 ыйын устата Биэнсийэ пуондатын салаата Ийэ хапытаалыгар 2891 сертификаты биэрдэ.
Урукку сылларга курдук, дьон Ийэ хапытаалын олорор усулуобуйаларын тупсарарга ыыталлар. Ол курдук ааспыт сэттэ ый устата 1198 мөл. солк. суумалаах 2980 сайабылыанньа киирбит. Балартан 1509 дьиэ кэргэн саҥа дьиэ атыыласпыттар, туттубуттар, эбэтэр урут атыыласпыт дьиэлрэин ороскуотун саппыттар. Оттон 1471 ыал хапытаалларын кирэдьииттэрин сабарга, бастакы усунуос быһыытынан туттарга ыыппыттар.
Ол эрээри, Ийэ хапытаалын оҕону үөрэттэрэргэ, көрүүгэ-харайыыга туһаныахтарын баҕарааччылар сыллата элбээн иһэллэрэ бэлиэтэнэр. Былырыыҥҥыга тэҥнээтэххэ, быйыл бу хайысхаҕа 345 сайабылыанньанан (29,3%) элбэх эбит. Бу сыл саҥатыгар Ийэ хапытаалын туһаныыга уларытыылар киирбиттэрэ. Ол чэрчитинэн, оҕо үс сааһыгар диэри туһанары бобуу уһуллубута, онон оскуола иннинэ үөрэтэргэ, чааһынай саадка сырытыннарарга үс сылы кэтэспэккэ туһаныахха сөп буолбута. Өрөспүүбүлүкэҕэ 58 дьиэ кэргэн (17%) бу кыаҕынан туһанан, чааһынай дьааһыла-саад өҥөтүн төлөөбүттэр.
Ону тэҥэ 2018 сылтан кыра дохуоттаах ыаллар Ийэ хапытаалыттан ый аайы ылан туһанар кыахтаммыттара. Иккис оҕолоро быйыл төрөөбүт буоллаҕына уонна хас биирдии киһиэхэ тиксэр тиийинэн олоруу алын кээмэйин 1,5 төгүллээх сууматыттан кыра дохуоттаах буолуохтаахтар диэн усулуобуйалаах. Сыл саҥатыттан 98 сайабылыанньа киирэн, 5,9 мөл. солк. тыырыллыбыт.
Икки дьиэ кэргэн хапытаалы биэнсийэни мунньууга ыыппыт.
Ийэ хапытаалын бырагыраамата саҕаланыаҕыттан, барыта 17,4 млрд. солк. суумалаах 79433 сертификат бэриллибит.
Ангелина Васильева, “Саха сирэ” хаһыат, edersaas.ru