Бас билии көрүҥүттэн тутулуга суох, өрөспүүбүлүкэ үрдүнэн быйыл 484 тыһ. 972 т от, 18 тыһ. 902 т сиилэс уонна 11 тыһ 850 т сенаж бэлэмнэниэхтээх. Элбэх сүөһүлээх-сылгылаах улуустар былааннара улахан.
Edersaas ru.
Холобур, Мэҥэ Хаҥалас улууһа 43 тыһ. 246 т оту, 2 тыһ. т сиилэһи, 1 тыһ. 150 т сенаһы, Чурапчы улууһа 40 тыһ. 983 т оту, 800 т сиилэһи соҕотуопкалыахтаахтар. Отуттан тахсалыы туонна оту Сунтаар, Таатта, Уус Алдан, Амма, Нам уонна Ньурба улуустара оттуохтаахтар.
Тыа хаһаайыстыбатын уонна ас-үөл бэлиитикэтин министиэристибэтин Сири оҥорууга, мелиорацияҕа уонна материальнай-техническэй хааччыйыыга департаменын салайааччы Василий Чичигинаров иһитиннэрэринэн, от ыйын 13 күнүнээҕи туругунан, 2163 гектар ходуһа охсуллубут, 873 туонна от кэбиһиллибит. Билигин өрөспүүбүлүкэ үрдүнэн 1574 отчут, 396 араас мааркалаах тиэхиньикэ, 45 мэхэньисээссийэлэммит, 202 ситэтэ суох мэхэньисээссийэлэммит, 14 көлө-илии, 194 илии звенолара күөх быйаҥ күрэҕэр үлэлии-хамсыы сылдьаллар.
Кураантан өрүсүһэн илин эҥээр уонна сорох киин улуустар хотуурдарын эрдэ тыаһаппыттара. Онон, билигин Чурапчы отчуттара 213, Хаҥалас хаһаайыстыбалара 123, Амма хотуурдаахтара 103 туонна оту чөкөттүлэр. Атын да улуустар окко киириини саҕалаатылар, бүлүүлэр 82, сунтаардар 62, үөһээ бүлүүлэр 58, мэҥэ хаҥаластар 54, намнар 44 туонна кэбиһиилээхтэр. Саҕалааһын куһаҕана суох. “Сайыҥҥы биир күн – дьылы аһатар” диэн мээнэҕэ этиллибэт. Хас биирдии күн былдьаһык.
Раиса Сибирякова, “Саха сирэ” хаһыат, Edersaas ru.