close
88 саастаах маастар дьөһөгөйүн оҕото
Култуура - Олох-дьаһах

88 саастаах маастар дьөһөгөйүн оҕото

Күндү доҕоттор, сахалыы кэпсэтэр-ааҕар, төрөөбүт төрүт тылларын умнубатах эдэр ыччаттарга, оҕолорго анаан, көрө сырыттыннар диэн, сыл аҥаарыттан ордук кэмҥэ сыралаһан үлэлээн, 88-с хаарыгар үктэммит ытык кырдьаҕас Мария Николаевна Петухова эт илиитинэн тутан-хабан, тигэн оҥорбут чуучулатын – дьөһөгөй оҕотун туһунан суруйан эрэбин.

edersaas.ru


Мария Николаевна Уус Алдан Тандатыттан төрүттээх, тыыл уонна педагогическай үлэ бэтэрээнэ, СӨ үөрэҕириитин үтүөлээх үлэһитэ, мындыр өйдөөх, уус тарбахтаах, иистэнньэҥ идэлээх, норуот маастара, үтүө-мааны киһи буолар.

Сааһырдым диэн таах олорбот, уонтан тахса сыл устата “Үһүс көлүөнэ оскуолатыгар”  бэйэтин үөлээннээхтэрин иистэнэргэ, сылгы сиэлиттэн, кутуругуттан ситии хатарга, салама оҥорорго үөрэтэр. Кини оҥорбут-айбыт паннолара, хартыыналара, үгүс оҥоһуктара өрөспүүбүлүкэтээҕи, Россиятааҕы, тас дойдуларга буолуталыыр быыстапкаларга кыттан, дьон хайҕабылын ылаллар, ону туоһулуур дипломнар, грамоталар элбэхтэр.

Дьөһөгөй оҕотун чуучулатын Мария Николаевна дьиэтигэр уура сылдьар. Детсаадтар, атын да тэрилтэлэр уларсаннар, оҕолорго көрдөрөллөр, кэпсииллэр.

Саха аймах үөскүөҕүттэн сылгыны иитэн, көлө оҥостор, тириититтэн таҥас-сап тиктэр. Аны этинэн, кымыһынан — мааны. Аҥардас, тымныы кыһыҥҥа бэйэтэ хаһан аһыырынан – бу Аан Ийэ дойдуга тэҥнээҕэ суох.

Мария Николаевна дьөһөгөйүн оҕотун туох баар тэрилин, киэргэлин ааттаталаан туран, оҥорбут. Оскуолаҕа үөрэппит оҕом, билигин Уус Алдан Кэптэнитигэр сылгы ферматын сэбиэдиссэйэ Петр Петрович Кычкин мин сакааспынан, убаһа сиэлин-кутуругун, төбөтүн, атахтарын, тириитин киллэрэн биэрбитигэр махтанабын, диир бэтэрээн.

Чуучулатын каркаһын пеноплаһынан эрбээн, кыһан оҥорбут.

—Туттар сэбим диэн – аҕабыттан хаалбыт (1958 с.) кып-кыра быһах эрбии, чохороон сүгэ уонна билисэпиэт спицатыттан оҥорбут иннэм буолар. Үүнүн-тэһиинин кылтан-сиэлтэн өрөн оҥордум, аны ыҥыырын иннин көмүстээн, иҥэһэлээн, түү сөрүө (сиэлтэн) кычым, чаппараах тигэн олордуталаатым. Чуораанчыктаатым, үс салаалаах кыл кымньыы мас тутаахтаах оҥортоотум. Ат баайар сэргэ, чороон оҥортоон, силигин ситэрэн биэрдим, — диэн кэпсиир ытык кырдьаҕас, норуот маастара.

Дьэ,чахчы даҕаны кэрэ оҥоһуулаах дьөһөгөй оҕото! Сөхтүм-махтайдым. Талааннаах маастар Мария Николаевнаҕа махтанан тураммын, ыалдьыбакка-кээһэммэккэ, тумууга да ылларбакка, 100 сааһын томточчу туолан, дьоллоох уһун олоҕу оҕолорун-сиэннэрин, хос сиэннэрин ортолоругар үөрэ-көтө, этэҥҥэ олороругар баҕарыаҕыҥ!

 

                                         Серафим ЕГОРОВ,

                                          педагогическай үлэ уонна спорт бэтэрээнэ.

                                          Дьокуускай к.

#бүгүн: 1
0
0

Сайт матырыйаалларын ааптар көҥүлэ суох ылар бобуллар.
  1. 1 санаа

    Катерина О.

    Биир дойдулааҕым Мария Николаевна сылтан сыл аайы айылҕаттан бэриллибит удьуор уус талаанынан бар дьонун сөхтөрүөн сөхтөрөр. Махтал Мария Николаевнаҕа барҕа баай талааҥҥын бар дьоҥҥор бэлэхтии сылдьаргар, үүнэр ыччакка сүдү холобур буоларгыттан.

    18.07.2017


Notice: Undefined index: comment_notes_before in /var/www/edersaas/wp-includes/comment-template.php on line 2334

тринадцать + 16 =