9-с кылаас эксээмэнин сайабылыанньатын кулун тутар 1 күнүгэр диэри ылыахтара

Быйылгы үөрэх сылын маҥнайгы аҥаара ааста. Ону кытта эксээмэннэргэ бэлэмнэнии саҕаланна. Маныаха экспердэр быһааралларынан, ордук, судаарыстыбаннай эксээмэни саҥа туттарар оҕолор, тохсус кылаас үөрэнээччилэрэ долгуйаллар эбит.

Людмила Попова, “Саха сирэ” хаһыат, https://edersaas.ru/
Тохсус кылааһы бүтэрээччилэргэ Судаарыстыбаннай түмүктүүр аттестация (ГИА) сүрүн судаарыстыбаннай эксээмэн (ОГЭ) уонна судаарыстыбаннай выпускной эксээмэн (ГВЭ) форматынан ааһар. Ити эксээмэннэринэн оҕо уопсай билиитин бэрэбиэркэлииллэр. Судаарыстыбаннай түмүктүүр аттестацияҕа (ГИА-9) 9-с кылаас оҕолоро сайабылыанньаларын үөрэнэр оскуолаларыгар 2017 сыл кулун тутар 1 күнүгэр диэри биэриэхтэрин сөп. Бу болдьоҕу аһарар табыллыбат.
ГИА-ҕа академическай иэһэ уонна бары биридимиэттэргэ сыл түмүгүнэн “2” сыаната суох буоллахтарына киирэр кыахтаахтар. Быйыл тохсус кылааһы бүтэрэр үөрэнээччилэр уопсайа түөрт биридимиэккэ эксээмэни туттарыахтара. Ол курдук, нуучча тылын уонна математиканы булгуччу туттараллар. Ону таһынан, физика, химия, биология, литэрэтиирэ, география, история, обществознание, омук тыла, информатика уонна ИКТ, төрөөбүт тыл уонна литэрэтиирэ биридимиэттэриттэн иккини талаллар. Онон уопсайа, түөрт эксээмэни туттараллар.
СӨ Үөрэҕин уонна наукатын министиэристибэтэ быһаарбыт алын баалларын ыллахтарына, ГИА-ны ааспыттарынан ааҕыллар уонна уопсай орто үөрэхтээһин аттестатын ылаллар. Ити түөрт эксээмэнтэн иккитин кыайан туттарбатахтарына, сүрүн түһүмэххэ хаттаан киириэхтэрэ. Оттон резервнэй болдьоххо иккиттэн элбэх биридимиэти кыайан ааспатахтарына, эбэтэр биир эмэ биридимиэккэ хаттаан иккини ыллахтарына, 2017 сыл балаҕан ыйын кэнниттэн эрэ туттарар кыахтаахтар.
Итинтэн сиэттэрэн, икки түмүгү оҥостуохха сөп. Бастатан туран, урукку сылларга оҕо эксээмэннэрин кыайан туттарбатаҕына даҕаны, орто профессиональнай үөрэхтэргэ (училище, колледж) киирэр кыахтаах этэ. Билигин оннук буолбатах. Хаттаан тохсус кылааска хаалан үөрэнэр уонна эһиил эмиэ саҥаттан эксээмэннэри туттарар. Иккиһинэн, сыл устата чиэппэрдэригэр иккитэ суох буолуохтаах. Оччоҕо эрэ ГИА эксээмэннэригэр киирэр кыахтаах.

9-с кылаастарга ГИА ханнык күннэргэ ыытылларый?
— болдьох иннинээҕи кэм: муус устар 20 күнэ – ыам ыйын 6 күнэ
— сүрүн кэм: ыам ыйын 26 күнэ — бэс ыйын 29 күнэ
— эбии кэм: балаҕан ыйын 5-22 күннэрэ

Людмила Попова, “Саха сирэ” хаһыат, https://edersaas.ru/