Тоҕус уончалаах байанайдаах булчут атыттан түһэр санаата суох

Ааптар: 
Бөлөххө киир:

Таатта улууһун Баайаҕа нэһилиэгин олохтооҕо,  тоҕус уончалаах  Дмитрий Дедюкин  бу күннэргэ 20-чэ көһү атынан сылдьан, кустаан кэллэ.


Бу туһунан кыыһа Саргылаана Дедюкина маннык кэпсиир:

Аҕам табаарыһын уола Сэмэни кытта Таатта Баайаҕатын Томторуттан Мөҥүрүөнүнэн 6 көс курдугу атынан айаннаан, Байымаайыга тиийэн, биир хоммуттар. Иккис күннэригэр  5 көс курдук сири айаннаан, Уус Алдан Халыма үрэҕэр тиийэн, хонор сирдэрин булбуттар. Онтон Бэһэлинэн Кутааманан айаннаан, 5 көс курдугу атынан сылдьан, Байанайдара бэрсэн, 30-ча куһу бултаабыттар. Бу сылдьан айылҕа мааны уонна кэрэ кыылларын — кииһи, саһылы, мас көтөрүн — куртуйаҕы көрбүттэр. Аҕам сөбүлүүр куһа — көҕөн. Онон бултаабын кустара үксэ көҕөн уонна чыркымай буолла. Төрөөбүт-үөскээбит Байымаайытын көрөн, уруккуттан бултуур-алтыыр сиригэр тиийэ сылдьан, оҕонньор олус үөрэн, астынан кэллэ.

Дмитрий Ефремович Саха сиригэр аатырбыт бөрөһүт. Таатталар чугастааҕы нэһилиэктэргэ анаан тиэйэн илдьэн бөрөнү бултаталлар эбит. Хас да сыллааҕыта Даайа Амматын баһылыга бөрө буулаабытыгар эмиэ анаан көрдөһөн илдьэн бултаппыт этэ. Ытык кырдьаҕас биир күн иһигэр адьырҕа кыыл албаһын үөрэтэн, хапкааннаан, күн бүгүҥҥэ диэри кэпсэлгэ сылдьар.
Дмитрий Дедюкин кустарын кыыһыгар туттаран баран, атыгар олороот, бүгүн сарсыарда эмиэ бултуу аттаммыт үһү.

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа Роман Романов түһэриитэ.

+1
0
+1
0
+1
0
+1
0
+1
0
+1
0
+1
0