“Якуталмаас” трест уонна “АЛРОСА” хампаанньа төрүттэммиттэрэ 60, 25 сылларыгар аналлаах “Дуэль алмазных резидентов“ диэн политическай-экономическай детектив ньыматынан суруллубут кинигэ таҕыста. Айымньы сүрүн дьоруойун прототибынан Вячеслав Штыров буолар. Кинигэ ааптара – суруналыыс, публицист, прозаик Вячеслав Щепоткин.
Ааптар кинигэтигэр алмаас хостооһунун, манан дьарыктанар “АЛРОСЕВ” хампаанньа, Гохран тустарынан, ол тула барар түгэннэри суруйар. Айымньы 90-с сыллардааҕы кэми көрдөрөр. Манна Россияны таһынан АХШ, Бельгия, Израиль, Греция ойууланаллар. Сүрүн дьоруой “АЛРОСЕВ” хампаанньа салайааччыта Владислав Широков үлэһиттэри түмэ тардара, сир баайын туһааннаах дьонтон харыстааһына, кинилэри кытары охсуһуулара детектив быһыытынан суруллубут.
Манна сүрүн миэстэни Хотугу өрөспүүбүлүкэ (Саха Өрөспүүбүлүкэтэ) ылар. Айымньы аата да этэринии, манна икки күүс охсуһуута көстөр. “Айымньыга икки сюжет тэҥинэн хатыйса сайдар. Дуэль курдук. Хайалара кыайтарыаҕын-хотуоҕун ааҕааччы бэйэтэ талар”, — диэн ааптар бэлиэтиир.
Аграфена КУЗЬМИНА, “Саха сирэ” хаһыат, edersaas.ru