От ыйын 17 күнүгэр sakhalife.ru саайтка СӨ тенниһин федерациятын толорооччу дириэктэрэ Любомир Михайлов илии баттааһыннаах “Теннис бэтэрээннэрэ Дьокуускайы кытта бырааттыы куораты кытта доҕордоһуу сибээһин күүһүрдэллэр” диэн ыстатыйа тахсыбыта. Маны таһынан, от ыйын 19 күнүгэр Николай Бястинов “Тайм-аут” биэриитигэр Любомир Михайлов остуол тенниһигэр Саха сирин бастыҥ бэтэрээннэрэ Кытайга ситиһиилээхтик күрэхтэһэн кэлбиттэрин туһунан кэпсээбитэ. Ол эрэн, Саха сирин теннисиистэрэ уонна теннис бэдэрээссийэтин чилиэннэрэ Любомир Михайловы Саха Өрөспүүбүлүкэтин тенниһин бэдэрээссийэтин толорооччу дириэктэрэ буолбатах, сымыйаччы, саха спордун түһэн биэрээччи диэн Аһаҕас сурук түһэрбиттэрэ. Үөскээбит балаһыанньаны быһаарарга сананан, туһааннаах экспертэр санааларын иһиттим.
Албын салайааччы
Василий Данилов, СӨ остуол тенниһин федерациятын чилиэнэ, спорт бэтэрээнэ:
-Любомир Михайлов албын салайааччы. Кини СӨ бэдэрээссийэтин толорооччу дириэктэринэн талыллыаҕыттан, бэдэрээссийэни ыһа сыста. Туох баар тутаах дьоммутун кытта этиһэн, айдаарсан эрэ таҕыста. Хас даҕаны тириэньэр аатыгар борокуратуураҕа, СӨ уонна РФ Спордун министиэристибэлэригэр уҥсүү түһэрбитэ төрүөтэ суох буолбуттара. Кини үлэтигэр саарбаҕалаан, “Дохсун” СК-гар уочарата суох мунньах тэрийбиппит. Кинини, ыыппыт үлэҕин, 40 тыһ солк. усунуос харчытын отчуоттаа диэн төлөпүөнүнэн, батсаабынан, электроннай аадырыһыгар сурук ыытан биллэрбиппит. Киһибит кэлбэтэҕэ. Ол иһин, уопсай куоластааһынынан, Максим Андреев саҥа толорооччу дириэктэринэн талыллыбыта. Любомир Михайлов бэчээти да, боломуочуйаны да туттарбакка, кэтэхтэн бэдэрээссийэ үлэтигэр мэһэйдэһэ сылдьар. От ыйын 10-12 күннэригэр биэс бэтэрээн теннисистэри мунньан, Кытайга табаарыстыы көрсүһүүгэ кыттан кэлбиттэрин интэриниэтинэн, араадьыйанан уонна тэлэбиисэринэн кэпсээтэ. Кинини кытта Саха сирин бастакы нүөмэрдээх теннисистэрэ барсыбатахтара. Биһиги ыыппыт өрөспүүбүлүкэбит чөмпүйэнээтигэр кыайтарбыт дьон баран, бары баллачча кыайтаран кэлбиттэр. Төннөн иһэн, Благовещенскай куоракка сылдьан киирсэн кэллибит диэн дакылааттаабыта. Амурскай уобалас тенниһин бэдэрээссийэтин толорооччу дириэктэрэ Николай Мельников Махтал сурук туттарда диэбитэ. Мельниковтан ыйыппыппар, олох да табаарыстыы киирсии буолбутун билбэт да эбит, Махтал сурук баттаабатаҕым диэбитэ. Любомир Михайлов бэйэтэ бэлэмнээбит Махтал суругун Гусев диэн тириэньэр бэчээттээбит.
Тохсунньу 11 күнүгэр СӨ Спордун министиэристибэтигэр буолбут мунньахха, Георгий Русланович Любомир Михайловка боломуочуйаҕын туттар, Уһук Илин чөмпүйэнээтэ Саха сиригэр буоларыгар мэһэйдэһимэ диэн тоһоҕолоон эппитэ. Кини миниистир да этиитин улахаҥҥа уурбакка, күлүктэн үлэ ыыта сылдьар.
Миниистир орооһуо суохтаах этэ
Любомир Михайлов, СӨ теннис бэдэрээссийэтин толорооччу дириэктэрэ:
-Миигин 2017 сыл олунньутугар түөрт хандьыдааттан куоластаан бэдэрээссийэ толорооччу дириэктэринэн талбыттара. Талыллыахпыттан ыла өрөспүүбүлүкэбитигэр теннис сайдарын туһугар үлэлии сылдьабын. Дьокуускай куорат мэриятин кытта туруорсан теннис киинин туттараары, сир ылбыппыт. Бэтэрээннэргэ, өрөспүүбүлүкэ чөмпүйэнээтэ буолуон иннинэ, кыайыылаахтар Кытай Хэйхэ куоратыгар табаарыстыы көрсүһүүгэ барыахпыт диэн эрдэ этиллибитэ. Этиллибитин курдук, от ыйын саҕаланыытыгар Хэйхэҕэ тиийэн күрэхтэһэн кэлбиппит. Кэлэн иһэн Амурскай уобалас Благовещенскай куоратыгар таарыйан, кинилэр теннисистэрин кытта күрэхтэһэн, Махтал сурук ылан кэлбиппит. Кэлбиппэр, эйигин бэдэрээссийэ толорор дириэктэрин дуоһунаһыттан устубуппут диэтилэр. Миигинэ суох саҥа толорор дириэктэри талбыттар үһү. Ити сокуона суох мунньах ыытыллыбыт. Мунньаҕы туоһулуур докумуону миэхэ көрдөрбөтөхтөрө. Мин туох баар отчуоттары барытын туттара сылдьабын. СӨ спордун миниистирэ Георгий Балакшин миигин эбээһинэскин, бэчээккин туттар диэбитин кытта сөбүлэспэппин. Кини уопсастабыннай тэрилтэлэр дьыалаларыгар орооһуо суохтаах. Василий Данилов Аһаҕас суруга сымыйа сурахтартан турар. Дьыала харчыттан тутулуктаах. Бэйэм юрист идэлээх буоларым быһыытынан, дьыала хайдах оҥоһулларын билэбин. Бу айдаан улахан таһымҥа тахсан эрэр.
Мин толорооччу дириэктэринэн талыллыбытым
Максим Андреев, саҥа талыллыбыт СӨ теннис федерациятын толорор дириэктэрэ:
-Мин 2017 сыл ахсынньытыгар СӨ тенниһин федерациятын толорооччу дириэктэринэн талыллыбытым. Мин иннибинэ үлэлии сылдьыбыт Любомир Михайловы көрсөн, бэчээти уонна докумуоннары туттар диэбиппин туттарбатаҕа. Георгий Балакшин киниэхэ, бэдэрээссийэ үлэтигэр мэһэйдэспэккэ, боломуочуйаҕын туттар диэн эппитин ылымматаҕа. Сыл аҥарын кэриэтэ үлэни атахтаата. СӨ Юстициятын министиэристибэтигэр кытта тэҥҥэ үлэлэһэн, ЕГРЮЛ-га мин ааппын киллэттэрэри ситиспиппит. Ону туоһулуур докумуону мин бэс ыйыгар биирдэ ылбытым. Ол иннинэ, бэдэрээссийэ аатыттан тугу да гынар быраабым суоҕа. Билигин былаанаммыт үлэлэри саҕалаабыппыт. Ол курдук, Арассыыйа остуол тенниһин федерациятыгар уонна СӨ спортка министиэристибэтигэр аккредитация ааһан бүтэрэн эрэбит. Мантан ыла, Саха сиригэр остуол тенниһэ сайдарыгар күүстээх үлэни ыытыахпыт.
Түмүккэ:
Остуол тенниһин федерациятын толорооччу дириэктэрэ ким буоларын СӨ юстиция министиэристибэтиттэн ыйыталастым. Кинилэр миэхэ 2018 сыл от ыйын 20 күнүгэр баттаммыт, 2181447276338 бэлиэтэммит нүөмэрдээх, Андреев Максим Егорович СӨ остуол тенниһин федерациятын толорооччу дириэктэрэ буоларын туоһулуур ЕГРЮЛ-га суруллубутун бигэргэттилэр. Саҥа эдэр салайааччыга таһаарыылаах үлэтигэр ситиһиини баҕарыахха. Остуол тенниһэ Сахабыт сиригэр өссө күүскэ сайыннын.
Николай Попов, «Саха сирэ» хаһыат, edersaas.ru