Нам улууһун Хамаҕаттатыгар бу күннэргэ «Нэһилиэк күнэ» диэн бэртээхэй тэрээһин буолан ааста.
Елена ПОТОЦКАЯ, «Саха сирэ» хаһыат, https://edersaas.ru
Дьаһалта баһылыга Иван Максимов бэлиэтииринэн, бу маннык тэрээһин уонча сыл сыл устата ыытыллан, үгэскэ кубулуйда. Бу күн олохтоохтор «Аҕа уонна уол» диэн түөлбэлэр күрэхтэһиилэрин көрө олус сөбүлээн мусталлар. Быйыл да оннук буолла. «Үрдэл» түөлбэттэн Илья Заболоцкай уолунуун Максимныын, «Кытылтан» Василий Дьяконов уолунуун Васялыын, эмиэ бу түөлбэттэн Руслан Захаров оҕотунуун Дуоланныын, «Хардыыттан» Игнатий Брызгалов уолунуун Айталлыын , «Сайдамтан» Афанасий Степанов быраатыныын Пронялыын бэйэлэрин түөлбэлэрин чиэһин көмүскээтилэр. Уолаттар бары эмдэй-сэмдэй саастыылар — 5-7-с кылаас оҕолоро.
Аҕалар уолаттарын кытта уустук сорудахтары толордулар. Ол курдук, бастакынан 5 м уһуннаах хатырыктаах инчэҕэй тоҥ бэрэбинэни икки өттүн лафеттыы суоруу саҕаланна. Уолаттар мас тутан көмөлөстүлэр. Бириэмэҕэ буолан, күрэстэһии тыҥааһыннаах. Аны хаачыстыба эмиэ —дьүүллүүр сүбэ хараҕын далыгар.
Ол кэнниттэн салгыы 7 устуука кэрчик мас тахсар гына мас эрбээһин уонна хайытыы. Уол ону дьаарыстаан иһэр. Бу сорудаҕы толороот, биатлоҥҥа күрэхтэһэллэр. Аҕа үрүсээк сүгэһэрдээх булчут кэтит хайыһарын кэтэн, ыйыллыбыт дистнцияны эргийэн кэлэр. Сыал ытыыта саҕаланар.
Бу манан эрэ бүппэт. Аны кулуупка киирэн, кыттааччылар викторинаҕа билиилэрин «бэрэбиэркэлэнэллэр». Манна булка туттуллар сэби-сэбиргэли билэриҥ таһынан, нэһилиэгиҥ историятын кытта кэпсээн биэрэҕин. Талаан кытта дьүүллүүр сүбэ иннигэр көрдөрүллэр.
Дьэ, бэрт эрийсиилээх киирсиигэ барытыгар уһулуччу чорбойон, «Үрдэл» хамаанда кыайыылаахтара Илья Заболоцкай уола Максимныын инники күөҥҥэ таҕыстылар. Иккискэ Василий Дьяконов уолунун Васялыын бэлиэтэннилэр. Үһүс миэстэҕэ Руслан Захаров уола Дуоланныын тигистилэр.
Ити курдук, «Аҕа уонна уол» күрэҕин ыытан, хамаҕатталар «Нэһилиэк күнүн» олус сэргэхтик бэлиэтээтилэр. Бу тэрээһин быйыл нэһилиэккэ биллэриллибит Аҕа сылыгар ананна.
Елена ПОТОЦКАЯ, «Саха сирэ» хаһыат, https://edersaas.ru