Ис дьыала оперативниктара Мирнэйгэ, Алдаҥҥа, Бүлүүгэ уонна Дьокуускайга тахсыбыт уорууларга уорбаланааччылары туттулар.
Вера МАКАРОВА, «Саха сирэ» хаһыат, edersaas.ru
Ол курдук, Мирнэй полициятыгар биир киһи эрийэн, кини дьиэтиттэн 375 тыһ. солк. харчыта сүппүтүн туһунан тыллаабыт. Эмсэҕэлээччи быһаарбытынан, даачатыгар өрөмүөн оҥороору, баантан кирэдьиит ылбыт эбит.
Бу уорууга уорбаланан, 44 саастаах киһи тутулунна.
Барыллаан быһаарыынан, ити күн иннинэ маннык буолбут: бу киһи даачатыгар таксинан айаннаан иһэн, суоппары кытта бэркэ тапсан кэпсэппиттэр. Аара суолга массыына бампера алдьаммытыгар, үтүө санаалаах киһи суоппарга 25 тыһ. солк. бамперын өрөмүөнүгэр биэрэрин, харчыта даачатыгар баарын эппит.
Харчыны ылан, суоппар махтаммыт аатыран, арыгынан бэлиэтииргэ этии киллэрбитин, бу киһи сөбүлэспит. Онтон быстах кэмҥэ тахсыбытыгар, суоппар дьиэлээх хаһаайын харчытын барытын туумбаттан булан, уоран, атахха биллэрбит. Хаһаайын харчыта сүппүтүн сарсыныгар биирдэ өйдөөн көрбүт.
Аны салгыы бу уоруйах харчыны дьиэтигэр аҕалан кистээбитин, 19 саастаах уола ону булан ылан, аҕатыгар эппэккэ, барытын бэйэтигэр ылбыт. Ол харчынан таптыыр кыыһыгар ыарахан сыаналаах суотабай төлөпүөн атыыласпыт, массыынатын өрөмүөннэммит уонна ол-бу тус наадатыгар туттубут.
Алдаҥҥа. Көмүс хостуур тэрилтэ харабыла суох сириттэн «HYNDAI 360 LC-7» экскаватортан 410.169.49 солк. сыаналаах «R 360 LC-7» уматыгы хачайдыыр носуоһу уорбуттар. Оперативниктар уорбаланааччыны туппуттар — бу тэрилтэҕэ урут үлэлии сылдьыбыт киһи хас да күн арыгылаабыт, ол итирэ-кутура, аһыы-сии сылдьан, икки атаһын кытта носуоһу уорарга быһаарыммыттар. Итинэн кинилэр тапсыбат тойоннорун иэстэһэргэ санаммыттар.
Носуоһу уорбутун кэнниттэн биир атаһа ону Дьокуускайга батара диэн илдьибит эрээри, буруйдара арыллан хаалбыт.
Бүлүүгэ. Суол кытыытыгар үлэлиир биир кафеттан 13 тыһ. солк. уорбуттар. Бу буруйу оҥорууга уорбаланан, урут уорууга түбэһэн сууттана сылдьыбыт, ханна да үлэлээбэт 27 саастаах киһи тутуллубут.
Кафе үлэһиттэрэ туохха эрэ аралдьыйбыттарынан туһанан, харчыны каассаттан көрүөх бэтэрээ өттүгэр сойбоппут. Дьокуускайга айаннаан испит уорбаланааччы уорбут харчытын бензиҥҥэ уонна арыгыга туттубут.
Дьокуускайга. Биир дьахтар тимир гарааһын уорбуттар.
Киин куораттан төрүттээх 35 саастаах уорбаланааччы интернеккэ гараас атыылаһалларын туһунан биллэриини аахпыт. Уонна дьэ, атыылаһааччы ирдэбилигэр сөп түбэһэр гараастары көрдөөн киирэн барбыт.
Оннук гарааһы «Рабочай городок» оройуонун кытыытыгар булан, хараҥа буолаатын, грузовигынан кэлэн, тиэйэн барбыт. Ону аттынааҕы дьиэҕэ олорооччулар өйдөөн көрөн, уоруйах түргэнник тутуллубут.
Бу чахчыларынан «уоруу» ыстатыйанан холуобунай дьыалалар тэриллибиттэрин СӨ ИДьМ-тын пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.