Аҕыс киһи “Билиигинэн кыайыаҥ!” истипиэндьийэни тутта

Ааптар: 
Бөлөххө киир:

“Билиигинэн кыайыаҥ!” диэн анал истипиэндьийэни педагогтар маастарыстыбаларын, саҥаны киллэриилэрин көҕүлүүр, айдарыылаах оҕолору өйүүр сыалтан, 2002 сыллаахха СӨ бастакы бэрэсидьиэнэ М.Е.Николаев олохтообута.

edersaas.ru

Ити 15 сыл тухары үрдүк истипиэндьийэ лауреаттарынан ситиһиилээх үөрэнээччилэр, эдэр чинчийээччилэр, талааннаах ыччат, идэлэригэр бэриниилээх, үүнэр көлүөнэни билиигэ, наукаҕа сирдиир, талааннарын, дьоҕурдарын арыйар учууталлар, сайдыыны түстүүр, олоҕу кытта тэҥҥэ хаамсар үөрэх тэрилтэлэрин салайааччылара буолаллар.

Лауреаттары сүүмэрдээһиҥҥэ педагогическай наука кандидата, “Сахамедиа” ӨИБХ АУо генеральнай дириэктэрин солбуйааччы Афанасий Ноев салайааччылаах аҕыс киһилээх уопсастыбаннай хамыыһыйа үлэлиир. Быйыл лауреаттарынан Покровскай куорат (Хаҥалас улууһа) 3-с №-дээх оскуолатын 8-с кылааһын үөрэнээччитэ Алексей Филиппов, Томтор оскуолатын 10-с кылааһын үөрэнээччитэ (Өймөкөөн улууһа) Семен Атласов, Ленскэй куорат (Ленскэй улууһа) 3-с №-дээх оскуолатын 11-с кылааһын үөрэнээччитэ Олег Федюкович, Аксиния уонна Наталья Посельскаялар ааттарынан Дьокуускайдааҕы балет оскуолатын (кэллиэс) 3-с кууруһун устудьуона Николай Выломов, квалификация таһымын үрдэтии исписэлииһэ, СӨ В.А.Босиков аатынан Муусука үрдүкү оскуолатын (институт) преподавателэ Евдокия Карманова, М.К.Аммосов аатынан ХИФУ математикаҕа уонна информатикаҕа институтун математическай анализка кафедратын үрдүкү преподавателэ Виктор Марков, Өлүөхүмэ куорат (Өлүөхүмэ улууһа) Үөрэнээччилэр айар сайдыыларын уонна гуманитарнай үөрэхтэрин киинин дириэктэрэ, “Инникигэ хардыы” региональнай координационнай киин өрөспүүбүлүкэтээҕи бырагырааматын салайааччыта Ольга Рожкова, айар уонна инновационнай үлэ проректора, Гнесиналар ааттарынан Муусука Арассыыйатааҕы академиятын диссертационнай Сэбиэтин чилиэнэ, музыковед, музыкальнай психолог, искусствоведение уонна психология наукатын доктора, бэрэпиэссэр  Дина Кирнарская туттулар. Ольга Рожкова үлэтинэн командировкаҕа сылдьар буолан, кыайан кэлбэтэх. Ол да буоллар, махталын, эҕэрдэтин тиэртэ.

“Билиигинэн кыайыаҥ!” анал истипиэндьийэ быйылгы лауреаттарын аатыттан Дина Кирнарская тыл эттэ: “Атыттарга тэҥнээтэххэ, мин өрөспүүбүлүкэни туораттан кэтээн көрөбүн. Бу баай кыраай бэйэтин баайын бары күүһүн барытын ууран туран үлэлиир, кыһалҕаттан чугуруйбат, дьүккүөрдээх, хорсун, айылҕа уонна олох биэрбитин сыаналыыр эрэ дьоҥҥо уунар. Тоҕо диэтэххэ, бу кытаанах кыраайга айылҕа хас биирдии ууммутун, дьонун сыаналыыр эрэ киһи олорор кыахтаах. Михаил Ефимович, миэхэ, саха норуотун айылҕаҕа, олоххо, дьоҥҥо, уопсастыбаҕа махталлаах буолуу үтүө хаачыстыбатын көрдөрөр. Олоххо саамай сыаналаах киһи буоларын кэрэһилиир. Тоҕо диэтэххэ, барыта киһиттэн тутулуктаах. Махтанабын – Михаил Ефимовичка! Махтанабын — саха норуотугар!”, — диэн санаатын тиэртэ.

Онтон Михаил Николаев: “Тоҕо биһиги учууталы уонна үөрэнээччини тэҥҥэ тутабатый. Тоҕо диэтэххэ, учуутал уонна үөрэнээччи арахсыспат аргыстар, биир ситим буолаллар. Учуутал хайдаҕый да, оҕо эмиэ оннук. Бүгүн углеводород, ньиэп, гаас, үрдүк технология да туһугар мөккүөр барбат. Бүгүн өй, талаан, кэнэҕэски генийдэр тустарыгар барар!”, — диэн бэлиэтээтэ.

Тэрээһин кэнниттэн Өймөкөөн улууһуттан аан маҥнайгынан “Билиигинэн кыайыаҥ!” истипиэндьийэтин туппут Семен Атласовы кытта кэпсэттим. “Оскуолабытыгар “Поиск” диэн куруһуоктаахпыт. Сэттэ уол дьарыктанабыт. Улуус таһымнаах куонкурустартан саҕалаан, Саха сиринээҕи, Бүтүн Арассыыйатааҕы куонкурустарга кыттабыт. “Литературная Россия” диэн хоһоон ааҕыытын куонкуруһугар 2015, 2016 сылларга бастаан турабыт. Быйыл эмиэ кыттаары сылдьабыт. Салайааччыбыт — Мария Поликарповна Боярова. Тус бэйэм хоһоон ааҕыытынан 2012 сылтан дьарыктанабын. Хоһоон суруйбаппын эрээри, ааҕарбын сөбүлүүбүн. Куруһуокпут оскуола кыраайы үөрэтэр түмэлин иһинэн үлэлиир. Сүрүннээн ГУЛАГ лааҕырдарыгар утаарыллыбыт нуучча суруйааччыларын олохторугар, айар үлэлэригэр аналлаах. Олортон Борис Ручьев, Варлам Шаламов айымньыларын ордоробун. Быйыл сайын Шаламов төрөөбүтэ 110 сылыгар Вологдаҕа сылдьыбыппыт, Москваҕа тиийэн Өймөкөөҥҥө сытан суруйбут хоһооннорун  аахпыппыт.

“Билиигинэн кыайыаҥ!” истипиэндьийэни ылан баран маҥнай учууталлар кэлэн эҕэрдэлээбиттэригэр, тоҕо эҕэрдэлииллэрин тута өйдүү охсубатаҕым, итэҕэйбэтэҕим. Онтон кэлин наһаа үөрбүтүм. Бу истипиэндьийэ миэхэ өссө ордук эппиэтинэһи сүктэрэр”, — диэн улахан киһилии дуоспуруннаахтык хоруйдаата.

Людмила ПОПОВА, “Саха сирэ” хаһыат, edersaas.ru

Мария ВАСИЛЬЕВА (СИА) хаартыскаҕа түһэриитэ.

+1
0
+1
0
+1
0
+1
0
+1
0
+1
0
+1
0