Edersaas.ru саайтка тахсар сонуннарбытын үгүс киһи интэриэһиргээн ааҕар, социальнай эйгэҕэ сыһыаннаах суруйуу таҕыстаҕына тута төлөпүөннүүллэр, эрэдээксийэҕэ да кэлэн ыйыллыбыт өҥөнөн хайдах туһаныахха сөбүн ыйыталаһаллар. Биһиги бүгүн дьонтон киирбит ыйытыылары мунньан таһаарабыт.
edersaas.ru
Чэпчэки куортамҥа ким тиксэрий?
Икки кыра оҕолоох эдэр үлэһит дьиэ куортамныырыгар туох эмит социальнай чэпчэтии көрүллэр дуо?
Екатерина Корякина. Дьокуускай.
Муза Винокурова, Тутуу министиэристибэтин дьиэ-уот бэлиитикэтин отделын сүрүннүүр исписэлииһэ:
— Күн бүгүн Дьокуускайга «Ипотека уонна куортам дьиэтэ» диэн инники күөҥҥэ тутуллар бырайыак чэрчитинэн чэпчэтиллибит сыананан 24 кыбартыыраны куортамҥа биэрэллэр. Чэпчэтиинэн туһанааччылар ахсааннарыгар бастаан 1 группалаах инбэлииттэр, ыарахан туруктаах ыарыһах оҕолоох ыаллар киирэллэр.
Билиҥҥи туругунан, ырыынак сыанатыттан намыһах төлөбүргэ Каландаришвили аатынан уулусса, 25 А уонна Богдан Чижик, 31 баар икки дьиэни куортамныыллар.
Богдан Чижик аатынан уулусса 31 дьиэтигэр биир хостоох толору миэбэллээх, бытовой тиэхиньикэлээх 15 кыбартыыраны чэпчэтиллибит сыананан 14 000 солк. куортамныыллар. Бу дьиэни 1 группалаах инбэлииттэргэ уонна Дьокуускайга өр кэмҥэ эмтэнэ кэлбит ыарахан туруктаах ыарыһах оҕолоох ыалга куортамҥа биэрэллэр.
Интэриэһиргээбит дьон тустаах министиэристибэ дьиэ-уот бэлиитикэтин салаатыгар 42-00-15 эрийэн билсиэххитин, эбэтэр https://minstroy.sakha.gov.ru/ саайтка киирэн көрүөххүтүн сөп.
Халаантан эмсэҕэлээбиттэргэ
Пропискаламмыт дьиэтигэр олорбот эрээри, халаантан эмсэҕэлээбит киһи судаарыстыбаттан көмө ылар бырааптаах дуо?
Павел Борисов. Амма.
В.Н. Никифоров, СӨ Борокуратууратын социальнай эйгэҕэ сокуон туолуутун хонтуруоллуур отдел начаалынньыга, юстиция алын сүбэһитэ:
— Судаарыстыбаттан көмө ыларга, айылҕа содулуттан эмсэҕэлээбит киһи диэн хамыыһыйа билиниэхтээх уонна уу ылбыт дьиэтигэр регистрациялаах буолуохтаах. 01-05/1-642 №-дээх СӨ Айылҕа харыстабылын министиэристибэтин 2017 с. сэтинньи 29 күнүгэр бигэргэммит бирикээһигэр олоҕуран, СӨ бырабыыталыстыбатын резервнэй пуондатыттан көмө оҥорорго ГОСТ Р 22.3.05-96 быһыытынан, бастакы суол саамай наадалаах бас билиигэ дьиэ-уот, таҥас-сап, атах таҥаһа, утуйар таҥас, иһит-хомуос киирэллэр.
Онон, тустаах киһи халаантан эмсэҕэлээбитэ дакаастаннаҕына, алдьархай кэмигэр дьиэтигэр араас биричиинэнэн суох түгэнигэр, биир кэмнээх материальнай уонна бастакынан туттуллар тэрилин, бас билиитин сүтэрбитигэр харчынан көмө ылар толору бырааптаах.
Ыраах улууска – оптуобуһунан
Ньурбаҕа диэри оптуобус сайыҥҥы кэмҥэ сылдьар дуо, сыаната төһөнүй?
Зоя Алексеева. Дьокуускай.
Александр Иванов, Ньурбатааҕы НАТП салайааччыта:
— Дьокуускай — Ньурба икки ардыгар сылдьар соҕотох «ПАЗ» оптуобуспут билигин тэрилтэлэр (балыыһалар, драмтеатр уо.д.а) сакаастарыгар сүүрэр. Олбоҕо сымнаҕас, ыраах айаҥҥа табыгастаах гына оҥоһуллубута. Сакаас бүттэҕинэ, куорат автовокзалыттан дьону салгыы таһыахпыт. Билиэт сыаната 2000 солк. Биэнсийэлээх дьоҥҥо 1800 солк.
Кутталлаах сөтүө
Петуховка, Даркылаах курдук кутталлаах сөтүөлүүр сири тоҕо саппаттарый? Тоҕо итинник сирдэргэ биир да быыһааччы суоҕуй?
Алексей Иннокентьев. Дьокуускай.
Николай Фатеев, СӨ Быыһыыр сулууспатын үлэһитэ:
— Петуховкаҕа киирэр суолу хаспыппыт, дьону сэрэтэр сурук ыйаабыппыт даҕаны, туһа суох, сайын куйаас күннэр сатыылаатылар да сөрүүкүү киирээччилэри тохтоппоккун. Баара-суоҕа икки күн иһигэр 8 оҕону онно быыһаатыбыт. Өссө 30 киһи тыынын өрүһүйдүбүт. Сыл аайы дьон Петуховкаҕа, Даркылаахха, Жатайга ууга былдьаналлар. Онон, ити диэки сөтүөлүү барартан туттунар ордук.
Өрөспүүбүлүкэҕэ биир быһааччыга 30 000 кв.м. иэннээх сир, 700 000 күөллэр, өрүстэр тиксэллэр, ону барытын хонтуруоллуур, сынньана, сөтүөлүү кэлбит дьону барыларын батыһа сылдьан кэтиир кыахпыт суох. Ууга ыксаллаах түгэн тирээтэҕинэ, 112, 101, Быыһыыр сулууспа суһал төлөпүөнүгэр (4112) 45-90-19, 40-56-22 эрийиэххэ наада.
Сөтүө кэмигэр ыраас уулаах, биир тэҥ кумах, гравий түгэхтээх, түргэн сүүрүгэ суох анал көҥүллэммит сирдэри тала сатааҥ. 2 м. дириҥ сиргэ сатаан харбыыр да дьон ыраах бараллара кутталлаах.
Тымныы ууга дириҥҥэ сылдьан атаххыт иҥиирэ тартаҕына, икки илиигитинэн тилэххитин бэйэҕит диэки күүскэ тардыҥ, көхсүгүтүгэр тиэрэ сытан сынньаныҥ.
Өскөтүн сүүрүккэ оҕустардаххытына, сүүрүк утары харбаан сэниэҕитин эһимэҥ. Сүүрүк хоту биэрэк диэки харбааҥ. Уу эрийэр дьааматыгар түбэстэххитинэ ыксаабакка, аймаммакка, элбэх салгыны эҕирийэн баран умсуҥ уонна туох баар күүскүтүнэн сүүрүк хоту туора ойуҥ уонна уу үрдүгэр тахсыҥ.
Долгуҥҥа хачайданаары, устан иһэр суудунаҕа чугаһаамаҥ, сүүрүк тардан ылан эрийэр биинтэҕэ быраҕыан сөп.
Билбэт сиргитигэр умсумаҥ, мотуоркаттан, катертан ыстанан түһүмэҥ. Уу түгэҕэр туох баара биллибэт, араас тимир-туһах, боробулуоха иилистэ сытара үөһэттэн көстүбэт.
Элбэх үүнээйилээх, оттоох-мастаах үрдүк эмпэрэ сыырдаах сиргэ сөтүөлээмэҥ, уу анна хойуу силистэринэн, уктарынан дэлби үүнэн, киһини тардан ылыан син.
Онон, сөтүөлүүргэ куттала суох сири талыҥ, бэйэҕит кыаххытын, күүскүтүн билинэн ууга киириҥ, киһиргии-киһиргии үөс сиргэ куоталаһымаҥ, сэрэхтээх буолуҥ.
Сайыҥҥы сынньалаҥ
Быйыл чэпчэки сыанаҕа муораҕа киһи ханна сынньана барыан сөбүй?
Татьяна Владимирова. Дьокуускай.
Анастасия Павлова, “СахаМедТур+” дириэктэрэ:
— 55 саастарыттан үөһэ биэнсийэлээх дьоҥҥо кулун тутар ыйга эрдэттэн бронируйдуур ситиминэн Дьокуускайтан Кытайга Бэйдайхэ куоракка көтөн тиийэр, икки нэдиэлэ муора кытылыгар отельга олорон сынньанар, сарсыарда аһыыр путевканы 40 000 солк. атыылаабыппыт. Ону былдьаһыгынан ылан бүтэрбиттэрэ. Билигин балаҕан ыйга 46 000 солк. сынньана барар путевкалар бааллар. Оттон үлэлэригэр соҕуруу барарга айаннарын төлөтөр, эбэтэр социальнай сулууспалар ол ороскуотун уйунар түгэннэригэр, Москваттан Турцияҕа айаны ааҕан туран, 10 күҥҥэ үстэ аһыыр 3 сулустаах отельга биир киһи путевката 35 000 солк. саҕаланар. Вьетнамҥа 2 сулустаах саамай боростуой, сарсыарда биирдэ эрэ аһатар отель 70 000 солк. үөһэ атыыланар. Дуоллар үрдээн, икки нэдиэлэҕэ биир киһи айаҕар 1500-2000 дуоллар ирдэнэр.
Саамай чэпчэки 20 000 солк. саҕаланар сынньалаҥ Белоруссияҕа баар, ол эрэн, онно муора суох.
Дьиэ-уот төлөбүрүгэр субсидия
От ыйын 1 күнүттэн дьиэ-уот төлөбүрүн сыаната үрдээтэ, соҕотох олорор кырдьаҕас дьон уонна 5 оҕолоох ыал хомунаалынай өҥө төлөбүрүттэн босхолонуохтарын сөп диэни истибитим, ону хайдах оҥорторуохха сөбүй?
Айыллаана Ивановна. Дьокуускай.
Егор Павлов, СӨ Субсидия ааҕыныстыбатын физическэй сирэйдэри кытта үлэ отделын начаалынньыгын солбуйааччы:
— Босхолоноллор диэн сыыһа өйдөбүл. Дьиэ-уот төлөбүрүн толору кээмэйин төлүүллэр, онтон ол харчыларын субсидия оҥорторон, 100% тиийэ төттөрү ылыахтарын сөп. Маннык чэпчэтиинэн 23-гэр диэри саастаах күнүскү үөрэххэ үөрэнэр устудьуоннары ааҕан туран, 5 оҕолоох ыал уонна соҕотох олорор, үлэлээбэт биэнсийэлээх дьон бэйэлэрэ бас билэр дьиэлээх, онно куруук олорор пропискалаах, хомунаалынай өҥөҕө иэстэрэ суох буоллаҕына, туһанар бырааптаахтар. Ону таһынан, холобур, хомунаалынай төлөбүр дьиэ кэргэн ыйдааҕы дохуотун 15% куоһарар түгэнигэр эмиэ субсидия оҥоробут.
Санатан эттэххэ, докумуоннаргытын биһиги сулууспаларбытыгар, МФЦ тэрилтэлэригэр, эбэтэр судаарыстыбаннай уонна муниципальнай өҥө порталын www.e-yakutia.ru нөҥүө туттарыаххытын сөп.
Марианна ТЫРТЫКОВА бэлэмнээтэ.