Бэйэлэригэр эрэллээх да уоруйахтар баар буолаллар эбит! Ама, биллиэ суоҕа, тутуллуохпут суоҕа дии санаабыттара дуу?
Ол курдук, Ленскэйгэ биир дьахтар кыбартыыратыттан көмүс киэргэллэрин уонна суотабай төлөпүөнүн уорбуттар. Кини кэпсээбитинэн, өр кэмҥэ атын сиргэ үлэлии барбыт, оттон дьиэтин күлүүһүн биир билэр киһитигэр хаалларбыт.
Ол 30 саастаах, урут сууттана сылдьыбыт киһи бэйэ дьиэлэммит курдук сананан, атастарын дьахтар кыбартыыратыгар мунньан, арыгылыыр эбит. Биир оннук аһааһын-сиэһин кэмигэр хаһаайка кыһыл көмүс биһилэҕин, үрүҥ көмүс сыабын уонна суотабай төлөпүөнүн сойбоппут. Киэргэллэри ломбардка туттарбытын, полиция оперативниктара булбуттар.
Оттон Чурапчы улууһугар уорууга уорбаланааччы улаханнык кырбанан, уорбут төлөпүөнүн сиэбигэр уктубутунан балыыһаҕа киллэриллибит. Туох буолбут, хайдах манныкка тиийбит эбитий, бу 21 саастаах уол?
Эдэр киһи төрөөбүт Мындаҕаайытыгар олорон, аттынааҕы ыалларын дьиэтигэр тиийэн, ыйанан турар күлүүһү алдьатан киирэн, суотабай төлөпүөнү, харчыны уонна икки бытыылка буокканы ылан тахсыбыт. Уонна туох да буолбатаҕын курдук, аара суолга массыына тутан, Чурапчы сэлиэнньэтин диэки айанныы турбут.
Улуус киинигэр тиийэн, икки киһини кытта билсэ охсон, бииргэ арыгылаабыттар. Түүн буолуута харчыта уонна арыгыта бүтэн, эмиэ өр саарыы барбакка, аттынааҕы дьиэттэн уорарга санаммыт.
Онно тиийэн, дьиэ түннүгүн устан, иһирдьэ киирэн, куукунаттан харчы уорбут. Аттынааҕы хоско утуйа сыппыт хаһаайка уоруйах киирэн тахсыбытын түһээн да баттаппатах.
Оттон түүҥҥү «ыалдьыт» төттөрү арыгылаабыт атастарыгар тиийэн, кэлин тиһэҕэр, балыыһаҕа киириэр диэри кырбанан хаалбыт.
Бу чахчыларынан «уоруу» ыстатыйанан холуобунай дьыалалар тэриллибиттэрин СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.