Бу күннэргэ “Ааллаах Үүн таһаҕасчыттарын хорсун быһыылара” диэн кинигэ бэчээттэнэн таҕыста.
1943 сыллаахха суола-ииһэ эрэйдээх “Джугджурзолото” көмүс хостуур бөдөҥ тэрилтэҕэ тутуу матырыйаала, ас бородууктата тиийбэккэ, көмүсчүттэргэ уустук балаһынньа үөскээбитэ. Ол иһин бырабыытылыстыба өрөспүүбүлүкэ киин улуустарыгар көмүс хостооччуларга көмө оҥорорго ыҥырыы таһаарбыта. Амма, Мэҥэ-Хаҥалас, Чурапчы, Таатта, Томпо – барыта тоҕус улуус хас биирдии холкуоһун 8-10 куруусчута 40-50 сыарҕалаах атынан 350-400 киилэ таһаҕас тиэнэн, Охотскай Перевозтан сири-хайаны быысталаан, 253 км Ааллаах Үүҥҥэ диэри тиийэллэрэ.
— Бу хорсун дьоммутун үйэтитээри, икки сыл устата “Биир ньыгыл Арассыыйа” баартыйаны кытта биир ситиминэн үлэлээтибит. Ол курдук, 2015 с. “Дьокуускай-Ааллаах Үүн” маршрутунан массыынанан айан экспедициятын, быйыл кулун тутарга эмиэ бу маршрутунан хас да хонуктаах сүүрүү десанын тэрийбиппит. Сэрии кэмигэр таһаҕас таһааччылар саамай эрэйдэммит хайалаах сирдэригэр “Сэттэ дабааҥҥа” анал бэлиэ туруорбуппут. Гражданскай институттар сайдыыларын министиэристибэтин 375 солк. анал граныгар кыайан, тоҕус киин улуус оскуолаларын үөрэнээччилэрэ хос эбэлэрин уонна эһэлэрин ахтыыларын хомуйан, бу кинигэни бэлэмнээн таһаардыбыт, — диэн кэпсиир “Амма кырдалын ыччата” уопсастыбаннай тэрилтэ салайааччыта, “Ааллаах Үүн” бырайыак координатора Саргылаана Неустроева.
Кинигэҕэ матырыйааллара киирбит оҕолор “Үлэ фрона: Ааллаах Үүн” өрөспүүбүлүкэтээҕи научнай-практическай кэмпириэнсийэҕэ кыттыыны ыллылар. Бу кинигэ 300 экземплярынан таҕыста уонна өрөспүүбүлүкэ оскуолаларын библиотекаларыгар тарҕаныаҕа.
Елена ПОТОЦКАЯ.