Аан дойду чөмпүйэнээтэ: Саха тустууктара бары туораатылар

Ааптар: 
Бөлөххө киир:

Саха сириттэн хапсыһа тиийбит Владислав Андреев, Ньургун Скрябин, Андрей Бекренев, уонна Владимир Егоров төрдүөн мэлийдилэр.

Алтынньы 20 күнүттэн Венгрия киинигэр Будапешт куоракка көҥүл тустууга аан дойду чөмпүйэнээтэ ыытылла турар. Уопсайа күрэхтэһиигэ аан дойду бастыҥын ааты былдьаһа 50 дойду бөҕөстөрө муһуннулар. .

Бастакынан көбүөргэ Орто Халыматтан төрүттээх, Белоруссия чиэһин көмүскүүр Андрей Бекренев таҕыста. Көҥүл тустууга спорт маастара Белоруссия хамаандатыгар кыл-мүччү киирбитэ. Кини Дагестантан төрүттээх Асадулла Лачиновы кыайан сүүмэрдэммит хамаанда чилиэнэ буолбута. Кини 23 кыттааччылаах 61 киилэҕэ диэри ыйааһыҥҥа киирсибитэ. Бастакы эргииргэ 3:2 ахсаанынан Соҕуруу Корея бэрэстэбиитэлин, Лондоннааҕы Олимпиада кыттыылааҕын   Ким Чжинь Чолу кыайбыта. Иккис эргииргэ Андрейга Индия чөмпүйүөнэ Сонаба Гонган тахсыбыта. Бастакы мүнүүтэлэргэ Андрей соччо үлэлээбэккэ баал биэрэн баран, киирсии бүтүүтэ кимэ-кииритэлии сатаата да бириэмэтэ тиийбэтэ. Ол түмүгэр, 3:4 ахсаанынан хотторуу хомолтотун биллэ.

Иккис күн Македония чиэһин көмүскүү сылдьар Амма ыччата Владимир Егоров 57 киилэҕэ диэри киирсибитэ. Кини Ислам оонньууларын призерун, Узбекистан бэрэстэбиитэлин Нодиржон Сафаров утары тугу да кыайан оҥорбокко, 7:0 ахсаанынан кыайтарбыта.

Биир күүскэ эрэнэр уолбут, Европа түөрт төгүллээх призера, аан дойду чөмпүйэнээтин боруонса мэтээлин хаһаайына Владислав Андреев 57 киилэҕэ диэри ыйааһыҥҥа сэрэбиэй түмүгүнэн бастакы эргиири көтүппүтэ. Иккис эргииргэ Владислав тыҥааһыннаах киирсиигэ Ирантан Азия уонна Аан дойдутааҕы байыаннай оонньуулар призердара Реза Атри Нагарчины кыайан, салгыы тустар быраабы ылбыта. Финал 1/4-гэр Владислав утары былырыыҥҥы Азия уонна аан дойду чөмпүйүөнэ, Япония бөҕөһө Юки Такахаши тахсыбыта. Бастакы периодка 1:1 ахсаанынан иһэн, иккис периодка Япония бөҕөһө эбии үс баалы сурунан, 1:4 ахсаанынан Владиславы туораппыта. Юки Такахаши Дагестан бөҕөһө Заур Угуевы хотон финалга тахсыбыта буоллар, Владислав боруонса мэтээл иһин салгыы киирсиэ этэ. Ол эрэн, Заур Угуев Юки Такахашины холкутук кыайбыта.

65 киилэҕэ диэри Белоруссияттан киирсэ сылдьар, биир түмүс тутта сылдьар уолбут Ньургун Скрябин үс эргиир туһунна. Бастакы эргииргэ Гвинея Бисауттан сылдьар  Кумбе Мбалины 11:2 ахсаанынан холкутук кыайбыта. Иккис киирсиитигэр дөссө итэҕэтиилээхтик 12:0 ахсаанынан Кытай бэрэстэбиитэлин Хасибагенуну сабырыйбыта. Финал чиэппэригэр, 2017 сыллаах аан дойду чөмпүйэнээтин боруонса призеругар Алехандро Вальдеска утарсыы оҥорбото. Утарсааччыта атахха киирэн баран, «накат» приемунан эргитэн 11:0 ахсаанынан кыайда.

Николай Попов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0