Балаҕан ыйын 12 күнүгэр Аан дойдутааҕы баан норуоттар икки ардыларынааҕы таһымнаах эксперэ Джованни Аллегретти Саха сиригэр кэлбитэ. Кинини кытта Аан дойдутааҕы баан олохтоох нэһилиэнньэ көҕүлээһинин өйүүр бырагырааматын салайааччы Иван Шульга кэлэ сылдьар.
Саха сирэ олохтоох нэһилиэнньэ көҕүлээһинин өйүүр бырагырааманан үлэлээһиҥҥэ аан дойдуга 20 бастыҥ иһигэр киирэн, Аан дойдутааҕы баан үлэһиттэрин интэриэһин тардыбыт. Маны таһынан, парсипаторнай үбүлээһиннээх бырайыагынан, Саха Өрөспүүбүлүкэтэ Париж, Гренобль, Кито, Монтевидео курдук куораттары кытта IOPD диэн аан дойдуга бастыҥ куонкурус финалиһа буолбут.
Иван Шульга этэринэн, аҥардас Джованни Аллегретти курдук киһи Саха Өрөспүүбүлүкэтин үлэтин биһирээбитэ аан дойдуга улахан уопут курдук көрүллэр уонна норуоттар икки ардыларынааҕы таһымҥа тахсар. Олохтоох нэһилиэнньэ көҕүлээһинин өйүүр бырагырааманан, Саха сирэ Арассыыйаҕа мөккүөрэ суох бастыҥ эрэгийиэннэр истэригэр киирэр — диэн бэлиэтээтэ.
Бүгүн, балаҕан ыйын 13 күнүгэр, Саха Өрөспүүбүлүкэтин үбүн миниистирэ Валерий Жондоров салалталаах, Хаҥалас улууһун Булгунньахтаах нэһилиэгэр олоххо киирбит бырайыактары көрөр сыаллаах бара сырыттылар. Булгунньахтаах нэһилиэгэр олохтоох нэһилиэнньэ көҕүлээһинин өйүүр бырагырааманан, спорт уонна оҕо оонньуур былаһааккалара, уопсастыбaннай баанньык тутуллубут, култуура киинэ уонна оскуола өрөмүөннэммит.
Ыалдьыттары бүддьүөттэн биир да солкуобайы туһаммакка, олохтоохтор бэйэлэрин күүстэринэн туппут дьэрэкээн балаҕаннарыгар сахалыы таҥастаах, кымыстаах алаадьынан көрүстүлэр. Хаҥалас улууһун баһылыга Гаврил Алексеев, Булгунньахтаах баһылыга Денис Уваров ыалдьыттарын эбийиэктэринэн сырытыннаран көрдөрдүлэр. Денис Уваров бырайыактары хайдах олоххо киллэрбиттэрин туһунан Джованни Аллегреттига уонна Иван Шульгаҕа сырдатта. Салалта ханнык эбийиэги тутарын уонна өрөмүөннүүрүн нэһилиэнньэҕэ ыйытык ыытан баран быһаарар эбит. Олохтоохтор аукцион ыытан эбийиэктэр тутуллалларыгар харчынан көмөлөһөллөр. Оҕуруот аһын, ньирэйи, бэйэ оҥоһуктарын, биир бырысыап хара буору, аҕалар түмсүүлэрэ туруорбут 40 кустарын атыылаан харчы киллэрбиттэрин Аллегретти биһирээтэ.
Джованни Аллегретти, Аан дойдутааҕы баан норуоттар икки ардыларынааҕы таһымнаах эксперэ:
— Саха Өрөспүүбүлүкэтигэр бастакыбын сылдьабын. Маннык ыарахан, тыйыс тымныы усулуобуйаҕа олорон, дьон бырайыактары олоххо киллэрэрин олус интэриэһиргээн кэлбитим. Саха сиригэр Аан дойдутааҕы баан бырагыраамата туһаныллара олус үөрдэр. Саха норуота олус көхтөөх эбит диэн бэлиэтиибин. Саха таҥаһа, норуотун үҥкүүтэ дойдубун санатар. Мин Италия Сардиния арыытыттан төрүттээхпин.
Джованни Аллегретти Португалия Коимбра үнүбүрсүтүөтүн социальнай чинчийиилэрин киинин научнай үлэһитэ. Маны таһынан, кини Флоренция үнүбүрсүтүөтүн куораты салайыы хайысха доцена уонна «XXI үйэ демократията» бырагыраама дириэктэрэ буолар. Бүддьүөтү былааннааһын туһунан хас да кинигэлээх.
Николай Попов, «Саха сирэ» хаһыат, edersaas.ru