Алтынньы 15 күнүгэр Сочига «Большой» диэн комплекска аан дойдутааҕы ыччат уонна устудьуоннар бэстибээллэрин үөрүүлээх аһыллыытын сиэрэ-туома ыытылынна. Өрөгөйдөөх аһыллыыны аатырбыт продюсер Игорь Крутой уонна Арассыыйа тэлэбиидэнньэтин Академиятын чилиэнэ Алексей Сеченов уратытык уонна умнуллубаттык толкуйдаан оҥорбуттара сөхтөрдө.
Дьоһун суолталаах тэрээһиҥҥэ дойду бэрэсидьиэнэ Владимир Путин мустубут ыччаты бэстибээл аһыллыбытынан эҕэрдэлээтэ.
Маны таһынан демократическай ыччат аан дойдутааҕы бэдэрээссийэтин бэрэсидьиэнэ Никос Пападимитриу тыл эттэ. Бастатан туран, кини бэстибээли Арассыыйаҕа үрдүк таһымҥа тэрийбиттэрин иһин дойду бэрэсидьиэнэ Владимир Путиҥҥа уонна Арассыыйа олохтоохторугар махтал тылларын тириэртэ. «Биһигини фашизмы кыайбыт дьоруойдар дойдуларыгар көрүстүлэр. Аан дойдутааҕы ыччат бэстибээлэ норуоттар доҕордоһууларыгар сүгүрүйэр. Аан дойду ыччаттара эйэ туһугар сомоҕолоһуох!»- диэн ыҥырда.
Култуурунай өттүгэр дойду аатырбыт ырыаһыттара — Дима Билан, Полина Гагарина, Теона Дольникова, Нюша, Александр Панайотов, Юлия Паршута, Сергей Лазарев уонна Оne Republic бөлөх биэчэри киэргэттилэр.
Николай Попов, «Саха сирэ» хаһыат, edersaas.ru