Бу туһунан муус устар 18 күнүгэр СӨ Ис дьыалаҕа министиэристибэтигэр Экономическай буруйдары уонна хоруупсуйаны утары охсуһар управление салалтатын пресс-кэмпириэнсийэтигэр иһитиннэрдилэр.
Вера МАКАРОВА, «Саха сирэ» хаһыат, edersaas.ru
Управление начальнига, полиция полковнига Владимир Арбузов иһитиннэрбитинэн, 2011 сылтан саҕалаан, бүгүҥҥү күҥҥэ диэри өрөспүүбүлүкэ үрдүнэн 439 сүүйүүлээх оонньуулар саалаларын булан уодьуганнаабыттар.
Оннук сокуоннайа суох оонньуур саала баһыйар ахсаанын — 410 — Дьокуускай куоракка булан саппыттар (уопсай ахсаантан 93,4%). Маны таһынан, Нерюнгрига 12, Миирнэйгэ 8, Ленскэйгэ 1, Өймөкөөҥҥө 3, Хаҥалас улууһугар 2 уонна Мэҥэ Хаҥаласка 3 сааланы булбуттар.
Сокуоннайа суох эргитииттэн 4666 оонньуур аптамаат, 1796 монитор, 1020 системнэй блок, 28 ноутбук, 55 моноблок, 5 электроннай рулетка, 20 покер остуола, 72 ридер-каарта, 92 USB-носитель, 469 пластиковай каарта идентификатора, 87 «роутер» итиэннэ 6 445 578 солк. уонна 738 дуоллар былдьаммыт.
Пресс-кэмпириэнсийэҕэ бэлиэтээбиттэринэн, сүүйүүлээх оонньуулары сокуоннайа суохтук тэрийии чахчытынан 6 холуобунай дьыала тэриллибит. Тоҕо аҕыйах дьыала тэриллибитин итинник оонньуулары сокуоннайа суохтарын дакаастыыр уустугунан быһаардылар. Билигин итинник оонньуулар «дьүһүн кубулунан», букмекерскэй хонтуораларга, тотализаторга уларыйбыттар. Итинэн сибээстээн, маннык хонтуоралары нолуок уорганнарын кытта сотору-сотору бэрэбиэркэлииллэр.
Күүстээх үлэ 2011-2014 сылларга ыытыллыбыт. Билигин маннык саалалар куорат кытыытыгар чааһынай дьиэлэргэ, Дьокуускай киинигэр кыбартыыраларга, атыы-эргиэн кииннэригэр «хорҕойбуттар».
Оннук саалалары Кальвица, Дзержинскэй, Каландаришвили, Петровскай уо.д.а уулуссаларга турар дьиэлэргэ саспыттарын булан саппыттар.
Былдьаммыт оонньуур аптамааттары бастаан анал контейнердарга уураллар, онтон суут уурааҕа тахсыбытын кэнниттэн Росимуществоҕа биэрэллэр. Росимущество сыаналаабытын кэнниттэн сыбаалкаҕа таһааран, бульдозерынан тэбистэрэн күртэрэллэр.
Полицейскайдар маныаха биири тоһоҕолоон бэлиэтээтилэр — холуобунай дьыалаҕа тэрийээччи эрэ буолбакка, манна үлэлиир дьон бары — харабыл, контролер, администратор — холуобунай эппиэтинэскэ тардыллаллар.
Бу туһунан сиһилии «Саха сирэ» хаһыат ыам ыйын 3 күнүнээҕи нүөмэригэр ааҕыҥ.
Вера МАКАРОВА, «Саха сирэ» хаһыат, edersaas.ru
Хаартыска: ааптар түһэриитэ.