Былырыын дьону аймаабыт, итирик суоппар буруйунан тахсыбыт киһи өлүүлээх холуобунай дьыалалар тугунан түмүктэммиттэрэй?
Вера МАКАРОВА, «Саха сирэ» хаһыат, https://edersaas.ru/
Борис Шишмарев дьыалата. 2016 сыл кулун тутар ыйыгар Дьокуускай куоракка Можайскай уонна Жуковскай уулуссалар быһа охсуһууларыгар “Тойота Корона Премио”, “Тойота Королла”, “Тойота Ипсум” уонна КамАЗ массыыналар харсыспыттара.
Бу суол быһылааныгар киэн туттар спортсменкабыт, кик-боксиҥҥа аан дойду хас да төгүллээх чөмпүйүөҥкэтэ, РФ боксаҕа уонна кик-боксиҥҥа спорт үтүөлээх маастара, 32 саастаах Лидия Андреева сырдык тыына быстыбыта.
Бу суол быһылаанын чахчытынан РФ Холуобунай кодексатын 264-с ыст. 4-с чааһынан, ол эбэтэр, уруулга итирик олорон, сэрэҕэ суохтан киһини өлүүгэ тиэрдии бэлиэтэ баарынан, холуобунай дьыала тэриллэн, силиэстийэлэнэн, Дьокуускай куорат федеральнай суутугар 2016 сыл атырдьах ыйыгар ураты бэрээдэгинэн көрүллүбүтэ.
Суут уурааҕынан, бу суол быһылааныгар КамАЗ-53212 итирик суоппара Борис Шишмарев буруйдааҕынан билиниллэн, 2 сыл 10 ыйга уопсай эрэсиимнээх холуонньаҕа көҥүлэ уонна 3 сыл 6 ыйга тимир көлөнү ыытар бырааба быһыллыбыта.
Алексей Юрченко дьыалата. 2016 сыл атырдьах ыйыгар Дьокуускай куоракка Лермонтов уулуссатыгар “Мерседес” массыына “Тойота Чайзеры” кытта харсыһыытын түмүгэр, эдэркээн паара суорума суолламмыта. Холуобунай дьыала эмиэ 264-с ыст. 4-с чааһынан тэриллибитэ.
Ахсынньыга Дьокуускай куорат федеральнай суута бу дьыаланы көрөн, Кангаласс бөһүөлэгин 32 саастаах олохтооҕо, орто оскуола дириэктэрэ Алексей Юрченконы буруйдааҕынан билинэн, 5 сыл 6 ыйга көс-холуонньаҕа көҥүлүн быһарга уурбута.
Сууттанааччы адвоката ол бириигэбэри СӨ Үрдүкү суутугар ааһынан, суут ону көрөн, буруйун боруостуур болдьоҕун көҕүрэтэн биэрдэ – 3 сыл 11 ыйга. Бу – 24 саастаах эдэр киһи уонна 22 саастаах кыыс өлүүлэрин иһин!
Абалааҕа баар, бу 264-с ыст. 4-с чааһынан көрүллэр накаастабыл миэрэ – 7 сылга диэри болдьоххо көҥүлү быһыы эбит буоллаҕына, биһиги сууттарбыт дьон өлүүлээх маннык дьыалаларга саамай кыратынан уураахтыыллара!
Вера МАКАРОВА, «Саха сирэ» хаһыат, https://edersaas.ru/
Хаартыска: интернеттэн.