Үс күн устата барбыт “Абилимпикс” Национальнай чөмпүйэнээт эрэгийиэннээҕи сүүмэрдиир түһүмэҕэ түмүктэннэ. Куонкуруска 8 компетенциянан 48 киһи кытынна. Күрэхтэһии икки сиринэн — Дьокуускай куоракка уонна Нерюнгрига барда.
edersaas.ru
Эспиэрдэр, быйылгы куонкурус сорудахтара былырыыҥҥытааҕар төһө да уустуктарын иһин, кыттааччылар быдан күүстээхтэрин, баара-суоҕа биир сыл иһигэр хаачыстыба биллэ тупсубутун ыйаллар. Ол курдук, “экэниэмикэ уонна бухгалтерскай учуот” компетенция сүрүн эспиэрэ Виктория Захарова: “Дьокуускайдааҕы финансовай-экэнэмическэй кэллиэһи сэргэ Жатайдааҕы техникум, өрөспүүбүлүкэтээҕи лиссиэй-техникум бэрэстэбиитэллэрэ кытыннылар. Оҕолор бары олус күүстээхтэр. Бэл диэтэр, биһиги, эспиэрдэр сөхтүбүт. Сорудахтара ааспыт сылга холоотоххо быдан уустуктар. Ол эрээри, үгүстэр бааллара үрдүк. Хаачыстыбалаахтык бэлэмнэммиттэрэ тута көстөр. Күрэхтэһиини сэргэ, профориентационнай үлэлэр бардылар. Ол курдук, оскуола оҕолоро кэлбиттэрэ. Кинилэргэ бэйэбит идэбит туһунан кэпсээбиппит. Аны үлэ биэрээччилэр кытыннылар. Ити курдук, аҥаардас күрэхтэһиинэн эрэ муҥурдаммата”, — диэн бэлиэтиир.
Итиннэ эбэн эттэххэ, “Абилимпиксы” салгыы сайыннарыы туһунан мунньахха эспиэрдэр оҕолор тустаах чөмпүйэнээккэ кыттыбыттарын туһунан портфолиоларыгар хайаан даҕаны киллэриэххэ наадатын бэлиэтииллэр.
Оттон “Ворлдскиллс” Саха сиринээҕи дириэксийэтин салайааччыта Владислав Хабаров эспиэрдэри кытта чөмпүйэнээт кэмигэр үгүс кэпсэтиилэр, мунньахтар буолбуттарын этэр. Билиҥҥитэ ханнык компетенциялары эбэр, ханнык хайысханы тутуһан салгыы сайдар боппуруос турарын ыйар. “Эспиэрдэр сүүмэрдиир түһүмэҕи Дьокуускай, Нерюнгри куораттарга эрэ буолбакка, улуустарынан эмиэ ыытыахха диэн этиини көтөҕөллөр. Устудьуоннары уонна эдэр үлэһиттэри сэргэ оскуола үөрэнээччилэрин эмиэ хабыахпытын баҕарабыт”, — диэн инники былааннарын кэпсээтэ. Итини сэргэ, СӨ Үөрэҕин, наукатын министиэристибэтэ уонна Өрөспүүбүлүкэтээҕи үлэлээх буолуу судаарыстыбаннай кэмитиэтэ бу чөмпүйэнээккэ кыттыбыт оҕолору барыларын үлэнэн хааччыйарга сөбүлэҥ түһэрсэргэ быһаарыныы ылыннылар диэн эттэ. Күн бүгүн доруобуйаларыгар хааччахтаах дьону үлэнэн хааччыйыы боппуруоһа сытыытык турар. Онон бары даҕаны сөптөөх быһаарыныы диэн бэлиэтииллэр.
“Экэниэмикэ уонна бухгалтерскай учуот” компетенция кыайыылааҕа, Москваҕа барар путевканы туппут Дмитрий Капитонов: “Дьокуускайдааҕы финансовай-экэнэмическэй кэллиэһи быйыл бүтэрдим. Билигин үлэ көрдөһөбүн. Чөмпүйэнээккэ былырыын эмиэ кыттыбытым, иккис миэстэ буолбутум. Күрэхтэһиини олус уустук дии санаабатым. Үөрэппит буолан судургу уонна сыл устата күүскэ бэлэмнэммитим. Москваҕа финалга барарбар өссө бэлэмнэниэхпин наада. Иккиһинэн, былырыын кыттыбыт дьону кытта көрсөн ыйыталаһар санаалаахпын”, — диэн санаатын үллэһиннэ.
Кыайыылаахтар, призердар
“Сетевой уонна системнай администрирование”: 1. Васильев Виталий (П.И.Дуткин аатынан Дьокуускайдааҕы финансовай-экэнэмическэй кэллиэс) 2. Курзанов Виталий 3. Кирсанов Дмитрий (иккиэн Соҕурууҥҥу Саха сирин технологическай кэллиэһиттэн).
“Экэниэмикэ уонна бухгалтерскай учуот”: 1. Капитонов Дмитрий 2 м. Сивцева Харыстаана (иккиэн И.И.Фадеев аатынан финансовай-экономическай кэллиэстэн) 3 м. Варламов Герасим (Инбэлииттэри профессиональнай уонна медико-социальнай өттүнэн чөлүгэр түһэрэр өрөспүүбүлүкэтээҕи интернат-техникум).
“Кондитер дьыала”: 1. Иванова Галина (Дьокуускайдааҕы сервис технологическай техникума) 2. Рожина Марианна (Жатайдааҕы техникум) 3. Таппырова Дария (Дьокуускайдааҕы сервис технологическай техникума).
“Портной”: 1. Ноговицына Сардана 2. Григорьева Анжелика 3. Скрябина Саргылана (үһүөн Дьокуускайдааҕы технология уонна дизайн кэллиэһиттэн).
“Повар дьыалата”: 1. Седалищев Айхал 2. Андреев Эдуард (Дьокуускайдааҕы сервис технологическай техникума) 3. Петров Гаврил (Жатайдааҕы техникум).
“Электромонтаж”: 1. Курашев Евгений (Нерюнгри куорат 2-с №-дээх орто оскуолатын учуутала) 2. Баринов Родион 3. Комлев Олег (иккиэн Соҕурууҥҥу Саха сирин технологическай кэллиэһиттэн).
“Массыына өрөмүөнэ уонна көрүүтэ-истиитэ”: 1. Копылов Андрей (Соҕурууҥҥу Саха сирин технологическай кэллиэһэ) 2. Самойлов Геннадий (үлэтэ суох) 3. Зуккау Сергей (“Айгуль” ХЭУо транспортка салаатын начаалынньыга).
“Сварочнай технология”: 1. Буквич Владимир (“Электротехгарант” ХЭУо 4 разрядтаах электрогазосварщига) 2. Дюсенбаев Андрей (Соҕурууҥҥу Саха сирин технологическай кэллиэһэ) 3. Баженов Владимир (үлэтэ суох).
Людмила ПОПОВА, “Саха сирэ” хаһыат, edersaas.ru