Үөрэххэ киирбэтэх эбэтэр хойутаабыт абитуриеҥҥа сүбэ

Ааптар: 
Бөлөххө киир:

Абитуриент, от ыйа түмүктэннэ, үрдүк үөрэххэ хойутаатым эбэтэр кыайан киирбэтим диэн санааҕын түһэримэ. Өссө кэтэхтэн үөрэхтэр бааллар эбээт. Бүгүн Саха сиригэр үлэлиир түөрт судаарыстыбаннай үрдүк үөрэх тэрилтэлэригэр кэтэхтэн туттарсыы усулуобуйаларын билиһиннэрэбит.

«Сахамедиа», edersaas.ru

Хотугулуу-Илиҥҥи федеральнай университет

Бастакынан, өрөспүүбүлүкэ үгүс үлэһитэ үөрэнэн тахсар кыһатын – М.К.Аммосов аатынан Хотугулуу-Илиҥҥи федеральнай университеты ылан көрүөҕүҥ. Биир кэлим эксээмэн түмүгүнэн бакалавриат уонна специалитет бырагырааматынан кэтэхтэн босхо миэстэҕэ туттарсааччылартан сайабылыанньаларын от ыйын 26 күнүгэр, оттон төлөбүрдээххэ туттарсааччылартан атырдьах ыйын 10 күнүгэр диэри ылаллар. ХИФУ бэйэтэ ыытар тургутууларын ааһан үөрэххэ киирээччилэртэн от ыйын 31 күнүгэр диэри хомуйаллар. Магистратураҕа (кэтэхтэн) от ыйын 20 күнүгэр, аспирантураҕа – от ыйын 21 күнүгэр диэри биэриэххитин сөп.

Нерюнгритааҕы техническэй институкка (ХИФУ филиала) университет бэйэтэ ыытар тургутууларын ааһан киирэр кэтэхтэн төлөбүрдээх миэстэлэргэ алтынньы 20, биир кэлим эксээмэн түмүгүнэн киирээччилэргэ алтынньы 29 күнүгэр диэри ылаллар.

Миэстэтэ: Бакалавриакка, специалитекка, магистратураҕа холбоон 401 босхо, бакалавриакка, специалитекка, магистратураҕа, аспирантураҕа барыта 1123 төлөбүрдээх миэстэ көрүллүбүт.

Сыаната: Кэтэхтэн үөрэнээччилэргэ төлөбүрэ ортотунан сылга 66 тыһ. солк.

Элбэх сайабылыанньа: Ыстатыыстыка көрдөрөрүнэн, кэтэхтэн, сүрүннээн, педагогическай хайысхаларга үөрэнэллэр эбит.

Сүбэ: Убаастабыллаах абитуриеннар, ХИФУ-гар докумуоннары тутуу түмүктэнэрэ аҕыйах хонук хаалла. Сүрэххит сөбүлүүр идэтин талыҥ, докумуоҥҥутун туттарарга тиэтэйиҥ!

Тыа хаһаайыстыбатын академията

Саха судаарыстыбаннай тыа хаһаайыстыбатын академиятыгар докумуоннары тутуу болдьоҕо арыый уһун диэххэ сөп. Ол курдук, кэтэхтэн туттарсааччылартан алтынньы 1 күнүгэри диэри ылаллар.

Миэстэтэ: 2018-2019 үөрэх дьылыгар 1500 устудьуону үөрэххэ ылар былааннаммытыттан, 808 миэстэ босхо, итинтэн 320-тэ кэтэхтэн. Үөрэххэ ылыы кыһыҥҥы кэмигэр (тохсунньу-олунньу) бакалавриат уонна специалитет  245 миэстэтэ барыта туолбут. Хаалбыт 75 миэстэҕэ магистраннары уонна орто анал үөрэх бырагырааматынан устудьуоннары ылаллар.

Сыаната: Үрдүк үөрэх бырагыраамаларыгар сылга ортотунан 55-60 тыһ. солк, орто анал үөрэх исписээлинэстэригэр сылга 40 тыһ. солк. тэҥнэһэр.

Элбэх сайабылыанньа: Ааспыт сыл туругунан, кэтэхтэн үөрэххэ саамай элбэх сайабылыанньаны бэтэринээр, агроинженер, сир оҥоһуутун уонна кадастр, быраап уонна социальнай хааччыйыыны тэрийии, о.д.а. хайысхаларга биэрбиттэр.

Сүбэ: Ыгым бириэмэлээх эбэтэр дьиэлэриттэн-уоттарыттан уһуннук тэлэһийэр кыаҕа суох дьоҥҥо кэтэхтэн үөрэх саамай сөптөөх. Тыа сиригэр олорор, сайынын үлэлиир абитуриеннарга табыгастаах буоларын курдук, Академия бы­­йылгыттан үөрэххэ тутуу хампаанньатын икки түһүмэххэ (кыһыҥҥы, сайыҥҥы) араарда. Эһиилги үөрэх дьылыгар бакалавриат уонна специалитет бырагырааматынан туттарсыыга кыһыҥҥы түһүмэх 2019 сыл тохсунньу 15 күнүттэн саҕаланыаҕа. Оскуола кэнниттэн туттарсааччылары биир кэлим эксээмэн түмүгүнэн (4 сыл дьиҥнээҕинэн ааҕыллар), орто уонна алын анал үөрэх тэрилтэлэрин бүтэрбит­тэр Академия тус тургутуутун ааһан киирэллэр.

Култуура уонна искусство  Арктикатааҕы института

Оттон Саха сиригэр үрдүк үөрэхтээх култуура, искусство үлэһиттэрин  бэлэмниир соҕотох үөрэхпит кыһатыгар — Култуура уонна искусство институтугар кэтэхтэн босхо үөрэххэ докумуоннары тутуу номнуо түмүктэммит. Тоҕо диэтэххэ, тустаах үөрэх кыһатыгар аҥаардас билиини эрэ буолбакка, дьоҕуру, талааны эмиэ көрөллөр. Айар дьоҕуру көрдөрөр эксээмэни туттарар ирдэнэр. Манна төлөбүрдээх миэстэлэргэ балаҕан ыйын 15 күнүгэр диэри эһигини күүтэллэр.

Миэстэтэ: Кэлэр үөрэх дьылыгар барыта 295 миэстэ көрүллүбүтүттэн, 146-та — кэтэхтэн.

Сыаната: Кэтэхтэн үөрэх бары хайысхаларыгар үөрэх төлөбүрэ биир симиэстиргэ 26 тыһ. солк. тэҥнэһэр.

Элбэх сайабылыанньа: 2017-2018 үөрэх дьылыгар туттарсааччылар сүрүннээн, “библиотечнай-информационнай идэҕэ” уонна “социальнай-култуурунай идэҕэ” сайабылыанньа биэрбиттэр.

Сүбэ: Үөрэххэ туттарсар тургутуулар сүбэлэригэр (консультация) кэлиҥ, ыйытыыларгытын биэриҥ уонна эксээмэнтэн куттанымаҥ. Ордук хос докумуоннары (хадатаайыстыба, үлэ киниискэтин куопуйата, медицинскэй ыспыраапка) хомуйса сатаамаҥ. Орто анал үөрэҕи бүтэрбиккитин туоһулуур диплом уонна 3х4 кээмэйдээх икки хаартыска эрэ ирдэнэр.

Чурапчытааҕы физическэй култуура уонна  спорт института

Аны тыа сиригэр үлэлии олорор соҕотох үрдүк үөрэх тэрилтэтин – Чурапчытааҕы физическэй култуура уонна спорт институтун ылан көрүөҕүҥ. Манна докумуоннары балаҕан ыйыгар диэри туталлар эрээри, кыра араастаһыылаах эбит. Ол курдук, “физическэй култуураҕа” (магистратура) — балаҕан ыйын 20, “физическэй култуура” (бакалавриат), “рекреация уонна спортивнай-чэбдигирдэр туризм” балаҕан ыйын 15 күннэригэр диэри, педагогическай үөрэх уонна психолого-педагогическай идэлэргэ балаҕан ыйын 20 күнүгэр диэри ылаллар.

Миэстэтэ: Институкка кэтэхтэн туттарсыыга, уопсайа, 50 миэстэ көрүллүбүт.

Сыаната: Төлөбүрэ сылга ортотунан 60 тыһ. солк.

Элбэх сайабылыанньа: Ааспыт үөрэх дьылыгар педагогическай, психолого-педагогическай үөрэхтэргэ элбэх сайабылыанньа киирбит. “Физическэй култуура” идэҕэ, үгэс быһыытынан, миэстэ туолар.

Сүбэ: Орто анал үөрэхтээх, дипломнаах үлэлии сылдьар Сахабыт сирин олохтоохторун, сайдыан баҕарар дьону докумуон тутар хамыыһыйа “Триумф” спортсменнары бэлэмниир киин 2-с мэндиэмэнигэр атырдьах ыйын 20 күнүгэр диэри, ол кэнниттэн салгыы Чурапчыга институкка күүтэллэр.

Людмила ПОПОВА, “Саха сирэ” хаһыат, edersaas.ru

Хаартыскалар — интэриниэттэн.

+1
0
+1
0
+1
0
+1
0
+1
0
+1
0
+1
0