Тыа хаһаайыстыбатын уонна ас-үөл бэлиитикэтин министиэристибэтэ кыстыкка киириигэ айылҕа кубулҕатыттан улаханнык эмсэҕэлээбит Абый улууһугар сылгы ахсаанын чөлүгэр түһэрэр механизмы оҥордо. Судаарыстыба өйөбүлэ хайдах быһыылаахтык оҥоһуллуой?
Василий НИКИФОРОВ, «Саха сирэ» хаһыат, edersaas.ru
Механизмҥа ыйылларынан, абыйдар илин эҥээрдээҕи улуустартан 300 төбө сылгыны атыылаһыахтаахтар. Билигин сабаҕаланарынан, Чурапчы уонна Таатта хаһаайыстыбалара 100-түү, Амма уонна Мэҥэ Хаҥалас хаһаайыстыбалара 50-нуу убаһаны атыылыыр баҕалаахтар.
Убаһа атыытын аҥаарын, 50 бырыһыанын, судаарыстыба толуйар. Бу үптэн 7 мөл. 860 тыһ. солкуобайа өссө ааспыт сылга Абый улууһугар тиксэриллэн турар, оттон 17 мөл. 800 тыһ. солк. суумалаах үп быйылгы бүддьүөккэ көрүлүннэ. Сылгылары тиэйэн илдьии ороскуотун бүтүннүү судаарыстыба уйунар, ол кээмэйэ – 7,5 мөл. солкуобай. Механизмҥа маны таһынан оту, эбиэһи тиэйии ороскуотун толуйууга 9 мөл. 201 тыһ. солк. көрүллэр. Массыынанан 150 т от уонна 24 т эбиэс тиэйиллэрэ былааннанар.
Василий НИКИФОРОВ, «Саха сирэ» хаһыат, edersaas.ru