Абый улууһун авиапорда сабыллан, олохтоохтор айанныылларыгар үгүс эрэйи көрсө сылдьаллар. Соторутааҕыта «Эдэр саас» сайтка суруйан аһарбыппытын курдук, Дьокуускайга көтөөччүлэр кыһалҕаттан, Муома улууһунан эргийэн куораты булаллар.
Белай Гора бөһүөлэгиттэн Хонууга диэри көтөр бөртөлүөт сыаната 6500 солкуобай. Баһаам харчы. Оттон Дьокуускайга диэри 20 тыһ. солк. тахса. Кэлэ-бара 50-тан тахса тыһыынчаны ороскуоттууллар. Бу күннэргэ «Полярные авиалинии» авиа-хампаанньа үөскээбит быһыыны-майгыны учуоттаан, Белай Гора – Дьокуускай хайысхатынан авиабилиэттээх дьоҥҥо эбии ороскуоттарын төлүүр туһунан иһитиннэрдэ.
СӨ тырааныспарын уонна суол хаһаайыстыбатын миниистирин солбуйааччы Лена Семенова бэлиэтээбитинэн, билигин авиа-хампаанньа пассажир сайабылыанньатыгар олоҕуран, ороскуоттарын төлүүр.
Онон, кыһалҕаҕа ыктарбыт дьон, ороскуотурбут харчыларын төнүннэрэр кыахтаннылар. Сиһилии иһитиннэриини хампаанньа сүрүн офиһыгар: Дьокуускай к., Жуковскай уул., № 10, төл. 8-4112-44-33-39 билсиҥ.
Анивера АКИМОВА, «Саха сирэ» хаһыат, edersaas.ru