Афанасий Соловьев: “Үҥкүүнү талбытым – дьолум!”

Бөлөххө киир:

Биэстээҕэр кыракый Афоня, дьон үөрэн ытыһын күүскэ таһыннаҕына, хантан, кимтэн үөрэммитэ эбитэ буолла — сценаҕа ойон тахсан, хаттаан үҥкүүлээн барара эбитэ үһү… Уонна, саамай кылаабынайа – ис-иһиттэн үөрэн-көтөн, аһыллан, олус кыһаллан туран, хайаан даҕаны үҥкүүтүн бүүс-бүтүннүүтүн толороро!

Дьэ, ити курдук саҕаламмыта Афанасий Соловьев олоҕун анаабыт айар үлэтэ – үҥкүүтэ! Ол тэтимин кыратык да ыһыктан ылбакка – дьоҥҥо үөрүүнү аҕалар, мэлдьи саҥаны, сонуну уонна кэрэни айар, олоххо киллэрэр аналын күн бүгүҥҥээҥҥэ диэри тутуһан, илдьэ кэлэн, салгыы сайыннара, олус айымньылаахтык, таһаарыылаахтык үлэлии-хамсыы сылдьар.

Ити, төрөөбүт дойдутугар – Уус Алдан Дүпсүнүгэр сценаҕа уолчаан аан бастаан 3 саастааҕар тахсыаҕыттан, онтон детсад киһитэ 5 саастааҕар “сценаттан түспэт” артыыс буолуоҕуттан ыла, этэргэ дылы, син балачча кэм, балачча уу сүүрүгүрэн аастаҕа, балачча элбэх үҥкүү чаҕылхайдык толорулуннаҕа…

Российскай Федерация  уонна Саха Өрөспүүбүлүкэтин  үтүөлээх артыыһа Афанасий Соловьев бу күннэргэ лоп курдук 55 сааһын уонна айар үлэтин 35 сылын бэлиэтиир!

Ол курдук, кини олунньу 3 күнүгэр, төрөөбүт күнүгэр,  18 чаастан, Өксөкүлээх Өлөксөй аатынан Норуоттар доҕордоһууларын дьиэтигэр, дьонун-сэргэтин, махталлаах көрөөччүтүн, “Үҥкүү мин дьылҕабар” диэн айар киэһэтигэр  ыҥырар.

Артыыс дьоро киэһэтигэр айымньылаах үлэтин 30 сылын анаабыт күндү кэлэктиибэ – С.А.Зверев-Кыыл Уола аатынан СӨ Национальнай үҥкүү тыйаатыра уонна үҥкүүгэ уһуйар оҕолоро – “Бриллианты Якутии”  үҥкүү ансаамбыла, үөрэнээччилэрэ, уопсайа 200-чэкэ киһи кыттыаҕа.

Афанасий Соловьев кэлин 10 сыл Дьокуускайдааҕы 1N-дээх Оҕо искусствотын оскуолатын хореография салаатыгар преподавателлиир, оҕолору классическай да, сахалыы норуодунай да, кустук өҥүн курдук, араас эгэлгэ үҥкүүлэргэ үөрэтэр, саҥа үҥкүүлэри туруорар.

Соловьевтар – айар куттаах дьиэ кэргэн. Афанасий Афанасьевич кэргэнинээн, СӨ үтүөлээх артыыһа Зоя Михайловна Соловьевалыын иккиэн бииргэ үҥкүүлүүргэ ананан төрөөбүт курдуктар. Ол курдук бэйэ-бэйэлэригэр барсаллар, бэйэ-бэйэлэрин ситэрсэн биэрэллэр. Кинилэр дуэттарын — саха, нуучча уонна да араас омук – индиийискэй, испанскай, арабскай, колумбийскай, цыганскай, кабардинскай, кытайдыы… үҥкүүлэрин көрөөччү олус сөбүлүүр, ылынар.

Зоя, Афанасий Соловьевтар 2013 сыллаахха “Бриллианты Якутии” оҕо үҥкүүтүн ансаамбылын тэрийбиттэрэ. Бу эдэр эрээри, хайыы-үйэҕэ  ботуччу ситиһиилэрдээх кэлэктиип  туһунан ааҕааччыбытыгар биһиги дөрүн-дөрүн кэпсиибит.

Билигин “Бриллианты Якутии”  ансаамбылга, саалаларын арендалаан да үлэлии олордоллор,  Дьокуускай араас оскуолаларыттан 100-тэн тахса оҕо дьарыктанар. Төрөппүт усунуоһа арендаҕа, көстүүм тигиитигэр, педагогтар хамнастарыгар барар. Айылҕа биэрбит дьоҕуругар, талааныгар эбии үлэһит, дьулуурдаах оҕо элбэҕи ситиһэр, сайдар. Дьарыкка балет, гимнастика уруоктара хайаан да киирэллэр эбит. Манна педагогтар Сайнаара Иванова, Валерия Платонова, Любовь Яковлева кыһамньыларыттан элбэх тутулуктаах. Төрөппүттэр да этэллэринэн, сценаҕа тахсыы буоллаҕына, биир да оҕо арыыланан хаалбат, дьарыктанар оҕолор бары тахсаллар.

Соловьевтар ыра санаалаахтар. Ол – “Бриллианты Якутии”  ансаамбыл бэйэтэ бас билэр саалаланара буоллар, диэн.

—Оччотугар, бэйэбит саалалаахпыт эбитэ буоллар, холобур, элбэх оҕолоох ыаллар оҕолоро уонна ураты дьоҕурдаах, талааннаах оҕолор босхо дьарыктаныахтара этэ, — диэн кинилэр бүччүм санааларын үллэстэллэр.

“Саха сирин бриллианнарын” аҥардас быйылгы сылга кыайыыларын аҕыннахха – Болгарияҕа, Варна куоракка атырдьах ыйын бүтүүтэ ыытыллыбыт “Славянский олимп” диэн оҕолорго үҥкүү-ырыа фестиваль-куонкуруһугар Гран-при хаһаайыттарынан буолан, үөрэн-көтөн  эргиллибиттэрэ. Итиэннэ бу олох соторутааҕыта, тохсунньуга, Таилааҥҥа, Паттайяҕа тиийэн, “Аан дойдутааҕы Оҕо күнүн”  чэрчитинэн бүтүн кэнсиэри көрдөрөн, ситиһии көтөллөнөн кэллилэр!

Дьэ, оҕолор ситиһиилэрин уһуйааччыларын үбүлүөйдээх Дьоро киэһэтигэр өссө биирдэ дуоһуйа көрүөхпүт турдаҕа.

—Мин идэбэр сөпкө тайаммыппын. Хаһан даҕаны, биир да түгэҥҥэ, “таах сибиэ…”   диэбэтэҕим, саараама диэм да суоҕа. Онон, үҥкүүнү талбытым – дьолум! – диир Афанасий Афанасьевич.

Татьяна МАРКОВА.

+1
0
+1
0
+1
0
+1
0
+1
0
+1
0
+1
0