Бүгүн, алтынньы 1 күнүгэр Аҕам саастаах дьон аан дойдутааҕы күннэрэ бэлиэтэнэр.
Бу күн бары улуустарга, куораттарга араас тэрээһиннэр ыытыллаллар. Дьокуускай куоракка “Аҕа көлүөнэҕэ ытыктабыл, үтүө санаа күнэ” ыытыллар. Социальнай көмүскэл управлениетыгар (Ленин пр., 4/1) сарсыарда 9-тан күнүс 1 чааска диэри Аһаҕас аан күнэ буолар. Оттон биэнсийэҕэ сыһыаннаах ыйытыылары Биэнсийэ пуондатын управлениетыгар (Орджоникидзе уул., 23) тиийэн биэриэххэ сөп.
Ону тэҥэ, поликлиникаларга (1-кы №-дээх, 2-с №-дээх, 3-с №-дээх), Дьокуускай к. медицинскэй киинигэр аһаҕас аан күннэрэ, доруобуйа дьаарбаҥкалара, лиэксийэлэр, бэсиэдэлэр буолаллар. Манна доруобуйаны көрүнүү, сөпкө аһааһын, кыраһыабайдык кырдьыы, о.д.а. туһунан кэпсиэхтэрэ.
Алтынньы 3 күнүгэр күнүс 4 чааска “Үһүс саас оскуолата” Оҕо дыбарыаһыгар бырааһынньыктааҕы кэнсиэри уонна күһүҥҥү дьаарбаҥканы тэрийиэҕэ.
Алтынньы 4 күнүгэр социальнай көмүскэл управлениета Өксөкүлээх аатынан култуура дьиэтигэр «Славим возраст золотой» диэн тэрээһиҥҥэ олохтоох бородууксуйа атыытын, бырааһынньыктааҕы кэнсиэри ыытар.
Алтынньы 1-7 күннэригэр 70-тан аҕа саастаах биэнсийэлээхтэргэ куорат парикмахерскайдара чэпчэтиилэри олохтуохтара (докумуону көрдөрдөххө).
Чэпчэтиилэри оҥорор парикмахерскайдар аадырыстара:
— «Magic Beauty», Петр Алексеев уул, 83/9;
— «Hollywood», Дзержинскэй уул., 52/2, 2-с этээс, “Тамара” атыы дьиэтэ;
—Иванов парикмахерскайа — Лермонтов уул., 90;
—Птицефабрика мкр., 15 дьиэ, «Удачная покупка» универсам;
— «Новый стиль», Ленин пр., 19, бастакы этээс;
— «Аяна», Яков Потапов уул., 1/1;
— «Семейная”, Петровскай уул., 27;
— “Грация”, Ленин пр., 1, 23-с офис.
Алтынньы 5 күнүгэр өрөспүүбүлүкэ үрдүнэн «Старость — в радость» аахсыйа ыытыллар. Бу күн волонтердар аҕам саастаах дьоҥҥо көмөлөһүөхтэрэ. Аахсыйаҕа ким баҕарар кыттыан сөп. Доҕотторгутун, аймахтаргытын, кэлиэгэлэргитин мунньан, бөлөх тэрийэн баран, аҕам саастаах дьоҥҥо анаммыт тэрээһини ыытаҕыт. Холобур, сынньалаҥ киэһэлэрин, саахымакка-дуобакка күрэхтэһиилэри, кэнсиэрдэри тэрийии, дьиэҕэ-уокка көмөлөһүү, сууйуу-сотуу, материальнай көмө (эми, бородууктаны, таҥаһы-сабы атыылаһан биэрии, о.д.а.).
Ангелина Васильева, “Саха сирэ” хаһыат, edersaas.ru