«Саха сирин киэн туттуута» норуот бириэмийэтин «Тыа сирин чулуу үлэһитэ» номинациятыгар финалистартан бастыҥынан Амма улууһун олохтооҕо Аграфена Сутакова ааттаммыта.
edersaas.ru
Кини куоластааһыҥҥа финалист аатын ыларыгар 1198 куоластааҕа (онтон 727 — социальнай ситимнэргэ). Кыайыылааҕы быһаарар киирсиилээх куоластааһыҥҥа 4213 куолас бэриллэн (онтон 426 — социальнай ситимнэргэ), Аграфена Сутакова күрэстэһээччилэрин эрэллээхтик кыайбыта.
Аграфена Сутакова – САССР тыатын хаһаайыстыбатын министиэристибэтин Судаарыстыбаннай бириэмийэтин лауреата, тыа хаһаайыстыбатын үтүөлээх үлэһитэ, Амма улууһун уонна Бөтүҥ нэһилиэгин бочуоттаах олохтооҕо. 2012 с. киниэхэ Кремльгэ Дмитрий Медведев “Аҕа дойдуга үтүөлэрин иһин” IV истиэпэннээх уордьаны туттарбыта.
«Саха сирин киэн туттуута» норуот бириэмийэтин дьоруойун «Сахамедиа» холдинг пресс-киинигэр үөрүүлээх быһыыга-майгыга чиэстээтилэр.
«Сахамедиа» холдинг генеральнай дириэктэрэ Алексей Чертков:
— Судаарыстыбаннай наҕараадалардаах тыа сирин олохтооҕо өрөспүүбүлүкэ социальнай-экэнэмиичэскэй сайдыытыгар сүҥкэн кылаатын киллэрэн, биир дойдулаахтарын, Саха сирин олохтоохторун билиниилэрин ылыан ылла, — диэн бэлиэтээтэ.
Агрфена Сутакова ыанньыксытынан 64 сыл үлэлээбит! Кэргэниниин 11 оҕоҕо күн сирин көрдөрөн улаатыннарбыттар.
— Аграфена Егоровна үүнэр көлүөнэҕэ холобур буолан сыдьаайар сулуска тэҥнээх, — диэн СӨ тыатын хаһаайыстыбатын миниистирин бастакы солбуйааччы Василий Афанасьев бэлиэтээтэ.
Амма улууһун баһылыга Николай Архипов «Саха сирин киэн туттуута» бириэмийэ дьоруойа Аграфена Сутакованы киһи быһыытынан сыаналыыр биир түгэни холобурдаата:
— РФ президенэ Дмитрий Медведев уордьан туттара туран: «Эн өссө туохха баҕараҕыный?» — диэн ыйыппытыгар: «Нэһилиэгим хаһаайыстыбатыгар пиэрмэ туттарыахпын баҕарабын», — диэбит. Аграфена Егоровна оннук бэйэтинээҕэр дьонун-сэргэтин уйгутун толкуйдуур үтүөкэннээх киһи.
Аграфена Сутакова бу баҕа санаата туолан, кини үлэлиир хаһаайыстыбатыгар СӨ Тыатын хаһаайыстыбатын министиэристибэтэ уонна «Туймаада» ФАПК өйөбүллэринэн 240 төбө киирэр пиэрмэтэ тутулла турар.
Бу курдук, үтүө тыллар этиллэн, алгыс баһа сыаланан, «Саха сирин киэн туттуута» норуот бириэмийэтин «Тыа сирин чулуу үлэһитэ» номинация кыайыылааҕа Аграфена Сутакова сулустаах чааһа бэлиэтэннэ, дьоруой аата дорҕоонноохтук ааттанна.
Елена ПОТОЦКАЯ, «Cаха сирэ» хаһыат, edersaas.ru
Хаартыска — СИА-ттан.