Ахсынньыттан министиэристибэлэр уларыйыахтара

Бөлөххө киир:

Ахсынньыттан саҕалаан Тас сибээс, предпринимательство министиэристибэлэрэ суох буолаллара сабаҕаланар. Ол оннугар Инвестиционнай сайдыы министиэристибэтэ тэриллиэҕэ.

Ил Дархан Егор Борисов бу күннэргэ ыыппыт мунньаҕынан, министиэристибэлэргэ, биэдэмистибэлэргэ ахсынньыттан саҕалаан уларыйыылар киирэллэрэ быһаарылынна.

Бастатан туран, Ил Дархан уонна бырабыыталыстыба дьаһалтатын департаменнарыгар, секретариаттарыгар уларыйыы киириэҕэ. Өрөспүүбүлүкэ салалтата эһиилгиттэн бырайыагынан үлэҕэ көһөрүнэн, манна аналлаах туспа департамент тэриллиэҕэ. Ону сэргэ сорох вице-премьердэр секретариаттарын кыччатан биэриэхтэрэ. Манна сыһыаран эттэххэ, аҕыйах хонуктааҕыта Егор Борисов бастакы вице-премьерин — Ил Дархан уонна бырабыыталыстыба дьаһалтатын салайааччытын э.т. Федор Борисовы аныырын туһунан ыйаах таһаарбыта.

Иккиһинэн, майгыннаһар өрүттээх сорох министиэристибэлэри холбуур санаалаахтар. Ол курдук, Тас сибээс уонна Предпринимательство министиэристибэлэрэ холбоһуохтара. Бу икки биэдэмистибэ оннугар Инвестиционнай сайдыы министиэристибэтэ диэн тэриллиэҕэ. Ону сэргэ Үөрэх уонна Профессиональнай үөрэхтээһин министиэристибэлэрэ холбоһуох курдуктар.

Үсүһүнэн, бу саас ыытыллыбыт реформаҕа түбэспит сорох биэдэмистибэлэр статустара үрдээн биэриэҕэ. Холобур, Үлэ министиэристибэтин иһигэр киирбит Дьарыктаах буолуу департаменын суолтатын өссө үрдэтэн биэрэр былааннаахтар.

Ил Дархан бу уларыыйарга ахсынньыга илии баттыыр санаалаах. Оттон саҥа дуоһунаска анаммыт Федор Борисов, Михаил Гуляев (вице-премьер э.т. анаммыта) уонна Юрий Куприянов (Москваҕа Саха сирин бастайааннай бэрэстэбиитэлинэн үлэлии барбыта, кини дуоһунаһыгар бастакы вице-премьер диэн эбиллэн биэриэхтээх) Ил Түмэн мунньаҕынан бигэргэтиллиэхтэрэ.

Аграфена КУЗЬМИНА.

+1
0
+1
0
+1
0
+1
0
+1
0
+1
0
+1
0