Дьокуускайга сэтинньи 25 күнүгэр урбаанньыт Егор Макаров бас билэр «Муус Хайа» культурнай-сынньанар комплексыгар хартыына саалатыгар үгэскэ кубулуйбут “Туристар бэстибээллэрэ” буолан ааста.
“Кыһын Саха сириттэн саҕаланар” бэстибээл иитинэн, “Охота и рыбалка в Якутии” телепрограмма ыыппыт “Сезон удачи” өрөспүүбүлүкэтээҕи хаартыска күрэхтэһиитин кыайыылаахтарын чиэстээһининэн саҕаланна. Быйылгы күрэхтэһиигэ “Животный мир Якутии” уонна “Отдыхаем в Якутии” диэн икки номинациянан уопсайа 15-тан тахса үлэ киирбит. Саха Өрөспүүбүлүкэтин сибээскэ уонна информационнай технологияларга миниистирэ, телебиэрии ыытааччыта Александр Борисов, СӨ инвестиционнай сайдыыга уонна предпринимательствоҕа миниистирэ Антон Сафронов бэстибээл кыттыылаахтарын эҕэрдэлээн туран, хаартыска күрэхтэһиитин түмүгүн иһитиннэрэн, кыайыылаахтарга сыаналаах бэлэхтэри туттардылар.
Дьэ, ол кэнниттэн айанньыт, фотограф, “Муус Хайа” комплекс директора Егор Макаров мустубут дьону эҕэрдэлээн, саха сиэринэн оһоҕун оттон, арыылаах алаадьынан айах тутта, алгыстаах айан аартыга өрүү аһаҕас буоларыгар баҕа санаатын эттэ. Салгыы “Нордстрим” турфирма генеральнай дириэктэрэ Михаил Местников быйыл Саха сирин айанньыттарын кулууба тэриллибитин туһунан иһиттиннэрэн, билсиһиннэрии оҥордо. Ол курдук, кулууп састаабыгар, олохторун айылҕалыын ситимнээбит, туризм эйгэтигэр үлэлии-хамсыы сылдьар дьон киирбитин истэн, туристар ытыс тыаһынан ситэрдилэр. Олор истэригэр, Герман Арбугаев, Георгий Цыпандин, Галия Дьячковская, Нелли Пахомова, Аркадий Дорофеев, Людмила Зорина, Розалия Иванова, Сергей Осипов бааллар. Өссө саха кыргыттарыттан биир бастакынан Непалга 6000 миэтэрэ үрдүктээх Айленд Пик хайа чыпчаалыгар тахсыбыт Сахаяна Александрова айанньыттар кулууптарын биир хорсун санаалаах туриһынан буоларын эттэ.
Бу күн быйылгы 2017 сыл устата киэҥ-нэлэмэн Сахабыт сирин устун, уустуктары-моһоллору туораан сылдьыбыт 10 улахан айан отчуотун иһиттибит. Ол курдук, бэстибээл Георгий Цыпандин салайааччылаах Сарычев хребетигэр хайыһарынан айан отчуотуттан саҕаланна. Салгыы, Михаил Местников Муомаҕа киһи атаҕа үктэнэ илик «Затерянный мир» айанын отчуота үгүс киһини сэҥээртэ. Киһилээххэ, Өймөкөөн хайаларын устун айан, туристар сайыҥҥы слеттарыттан, Галия Дьячковская салайар “SUOL” сатыы хаамааччылар кулууптарын кэпсээнэ, «Сунтаар Хайата» айан бииртэн биир олус интэриэһинэй, сэргэх, хаартысканан, видеоустуунан ситэриилээх отчуоттар дьон-сэргэ биһирэбилин ыллылар. Кыттааччылар “Нордстрим” турфирма тэрийбит, Вячеслав Местников салайааччылаах Муомаҕа похуода барыларыттан уһун кэми ылбытынан, 30-ча күннээҕин, сатыы, атынан уонна уунан айаннаабыттарын сөҕө иһиттилэр. Уопуттаах туристар Сахабыт сирин устун ыраах айаҥҥа турунарга эт-хаан, өй-санаа өттүнэн турукка киирэн, эрдэттэн бэлэмнээх буоларга сүбэлэрин эттилэр. Таас хайа быыһынан аччаабыта 20 киилэ ыйааһыннаах үрүксээги сүгэн, сорох сирдэринэн бадараан, муох, сииктээх миэстэлэри туораан, уһун ардахтарга түбэһэн, суол моһоллорун этэҥҥэ туораабыттарын, мүччүргэннээх сырыыларын кэпсээтилэр. Төһө да уустук күннэр аасталлар, Сахабыт сирин кэрэ, хатыламмат хартыынатын көрөн, сылаа да тахсарын, ыарыы ааһарын, улахан айаҥҥа сылдьыбыт туристар бу сырыыларын олохторун умнуллубат түгэнинэн ааҕалларын бэлиэтээтилэр.
Айанньыттар интэриэһинэй кэпсээннэрин кэмигэр, аар айылҕа кэрэтин хаартыскаҕа хатыыр, биллиилээх фотограф Михаил Черемкин быыстапката турда. Ону тэҥэ, бэстибээл кыттыылаахтара дьоллоох түгэни мүччү туппакка хаартыскаҕа түһэриилэрин атастаһан, бэлэхтэһэн астыннылар. Кыттааччылар туристар бэстибээллэрин тэрээһинэ сыл аайы тупсан, кэҥээн, Саха сирин туризмын сэҥээрээччи элбээн иһэрин бэлиэтээн эттилэр. Быйылгы бэстибээл уопсай хаартыскаҕа түһүүнэн, саха оһуохайын түһүлгэтинэн түмүктэннэ.Үгүс ыалдьыт быйыл хайа улууска, ханнык маршрутунан уһун айаҥҥа турунарын былааннанна. Бэстибээли тэрийээччилэргэ, чуолаан “Нордстрим” турфирма дириэктэригэр, Михаил Местниковка, сыл аайы айылҕаны таптааччылары үөрэ-көтө, ыалдьыттата көрсөр “Муус Хайа” комплекс хаһаайыныгар Егор Макаровка махтал, хайҕал тылларын тириэртилэр.
Екатерина Бястинова.