Дьокуускайга, историческай пааркаҕа, өрөспүүбүлүкэ култууратын, искусствотын инники кэскилин, аныгы үйэҕэ үгэстэри тутуһуу уонна инновациялары сайыннарыы проблемаларын дьүүллэһэр дискуссионнай былаһаакка ыытылынна.
Манна айар идэлээх дьон, култуура, искусство үлэһиттэрэ – муусукааннар, суруйааччылар, артыыстар, худуоһунньуктар, киинэ, билитиэкэ, издательство, мусуой үлэһиттэрэ санааларын үллэһиннилэр. Кэпсэтиигэ СӨ баһылыгын эбээһинэһин быстах кэмҥэ толорооччу Айсен Николаев кытынна. Хас биирдии тыл этээччи култуура, искусство саҥа таһымҥа тахсар суолларын дьүүллэстэ.
Биһиги өрөспүүбүлүкэбит култуурата, искусствота, биллэн турар, Уһук Илиҥҥэ инники күөҥҥэ сылдьар, ол эрээри онон уоскуйбакка, бүтүн Арассыыйа уонна аан дойду таһымыгар салгыы тахсар, биллэр-көстөр тоҕоостоох кэм кэлбитин дьон тоһоҕолоон бэлиэтээтэ.
Айсен Сергеевич бу күннэргэ өрөспүүбүлүкэ устун үгүстүк айанныы, дьону-сэргэни кытта көрсө сылдьан, холобур, Нам, Мэҥэ-Хаҥалас, Уус Алдан курдук бөдөҥ улуустарга олохтоохтор Култуура дыбарыаһын тутууну туруорсалларын эттэ. Биллэн турар, култуураҕа өрөспүүбүлүкэҕэ холобурга сылдьар улуустар 60-с сыллардааҕы мас тутууларынан салгыы олороллоро сатаммат.
Култууранан нэһилиэнньэ барыта хабыллыахтаах.
— Ол аата – аныгылыы, үчүгэй хаачыстыбалаах дьиэ-уот, материальнай бааза. Тыа сирдэригэр элбэх функциялаах култуура эбийиэктэрин тутар наада. Маныаха госбүддьүөтү эрэ буолбакка, судаарыстыбаннай-чааһынай партнерствоны туһанар, бииргэ үлэлээһини өссө сайыннарар наада, — диэтэ Айсен Николаев.
Кини бу көрсүһүүгэ, дойду сайдыытыгар култуура суолтата муҥура суоҕун бэлиэтээн туран, кэккэ санаалары эттэ. Ол курдук.
Дойдуну аан бастаан култууратынан, искусствотынан, үгэстэринэн сыаналыыллар. Ол социальнай-экэнэмиичэскэй сайдыыга дьайар. Тыһыынчанан сыл историялаах култууралаах норуот ытыктанар.
Эрэмиэсилэнньиктэр уонна профессионаллар уратылаахтар, ол эрээри, хас биирдиилэрэ наадалаах, кинилэр ыкса ситимнээхтэр.
Саха киинэтэ үөһээ күөрэйэн таҕыста. «Тойон Кыыл». Бу ситиһиинэн уоскуйан хаалбакка, салгыы барар наада.
Киинэ, “Олоҥхо дойдута”, духуобунай Транссиб… Толкуй наада. Бэйэбит эрэ эрэгийиэммит күүһүнэн буолбатаҕына, олоххо киириэн сөп.
Тутуу туһунан элбэхтик этилиннэ. Уонна, бастатан туран, Кэнсиэртиир саала тутуутун көрүөххэ наада.
Култуурунай нэһилиэстибэбитин араҥаччылыахтаахпыт. Маныаха, Саҥа технологиялар министиэристибэлэрин кытта, цифровизация боппуруостарын көрөргө.
Каадыр барытын быһаарар. Ордук култуураҕа. Каадыры бэлэмнээһини манна, бэйэбитигэр уонна киин вузтарга күүскэ, киэҥ хабааннаахтык сайыннарар наада.
Суруйааччылар судаарыстыбаттан өйөбүллээх буолуохтаахтар.
Николай Лугинов – биһиги литературабыт тулааһына!
Владимир Путин култуура эйгэтигэр бэлиитикэтэ – дойду сайдыытын 12 хайысхатыттан биирэ култуура буоларын билинии. Биһиги этиилэрбитин киллэрбиппит: ыһыах, ЮНЕСКО шедеврдэрэ, Циркэ, ТЮЗ тутуута…
Ахсаан хаһан баҕарар хаачыстыбаҕа кубулуйар. Онон, ситиһиилэнэр туһугар, элбэхтик үлэлиир наада!
Маннык ис хоһоонноох, интэриэһинэй кэпсэтии таҕыста. Дискуссионнай былаһаакка үлэтигэр Ил Түмэн бэрэссэдээтэлэ Александр Жирков, СӨ Судаарыстыбаннай сүбэһитэ Андрей Борисов, о.д.а. кытыннылар.
Татьяна МАРКОВА,«Саха сирэ» хаһыат, edersaas.ru