Хаһан, ханна оҥоһуллубута биллибэт, атын сиртэн аҕалыллыбыт аһылыктааҕар бэйэ сиригэр-уотугар оҥоһуллубут, экологическай өттүнэн ыраас, сибиэһэй үүт-эт быдан ордуга уонна куттала суоҕа биллэр.
Тыа хаһаайыстыбатын уонна ас-үөл бэлиитикэтин министиэристибэтэ бэс ыйын 1 күнүттэн өрөспүүбүлүкэ киин куоратын эргиэнин ситимигэр «Саха сиригэр оҥоһулунна» диэн бырайыагын саҕалаата. Онон, бүгүҥҥүттэн Дьокуускай куорат маҕаһыыннарыгар (Кальвица уулуссатын 14/5 №-гэр баар «Айгуль» эргиэн киинигэр, Каландаришвили уулуссатын 42/1 №-гэр турар «Алмазка» итиэннэ Очиченко уулуссатын 17 Б №-гэр баар Дьокуускайдааҕы килиэп комбинатын «Мозаика» маҕаһыыныгар) «Саха сиригэр оҥоһулунна» диэн мааркалаах олохтоох ас-үөл атыыланар буолла. Бу сүрүннээн, «Сахаагропродукт» өрөспүүбүлүкэтээҕи кэпэрэтиип тула түмсүбүт улуустардааҕы ТХПК-га астаммыт үрүҥ ас, эт, эттэн оҥоһук, халбаһыы итиэннэ Дьокуускайдааҕы үүт собуотун, «Якутия» ҮХАПК бородууксуйалара.
Олохтоох аһы-үөлү биир брендинэн батарыы — экологическай өттүнэн ыраас, сибиэһэй тыа хаһаайыстыбатын бородууксуйатын маркетинын тупсарар, кээмэйин улаатыннарар уонна маҕаһыыннарга табаар эргиирин түргэтэтэр сыалтан оҥоһуллар.
Раиса СИБИРЯКОВА, “Саха сирэ” хаһыат, edersaas.ru
Хаартыскаҕа: 1.“Айгульга” атыы-быыстапканы арыйыы түгэнэ. 2. Атыылаһааччылар сэҥээрэллэр.