close

Айсен Николаев Хоккайдо губернаторын кытары көрүстэ...
· - Бэлиитикэ - Олох-дьаһах

Айсен Николаев Хоккайдо губернаторын кытары көрүстэ

Саха сирин дэлэгээссийэтэ бу күннэргэ Японияҕа тиийэн үлэлии сылдьар. Ил Дархан Айсен Николаев ахсынньы 3 күнүгэр Саппоро куоракка Хоккайдо губернаторын Харуми Такасахины кытары көрүстэ.

edersaas.ru

Көрсүһүүгэ Саха сирэ уонна Хоккайдо бииргэ үлэлэһэр сөбүлэһиилэрин туһунан кэпсэттилэр. Ол курдук, кэпсэтиигэ атыы-тутуу, научнай-техническэй, гуманитарнай көмө боппуруостарын, ону таһынан култуура, үөрэх, доруобуйа харыстабылын, туризм эйгэлэригэр бииргэ үлэлэһиини ырыттылар. Дойдулар икки өттүттэн сөбүлэстэхтэринэ, дуогабардарын 2019 сылга түһэрсиэхтэрэ. Бу туһунан мунньах боротокуолугар бэлиэтээтилэр.
Бэлиэтээн эттэххэ, Саха сирэ Японияны кытары уруккуттан үлэлэһэр. Үөрэх да, култуура да эйгэтигэр биир ситимнээх бырайыактары ыыталлар. Онон сибээстээн бу көрсүһүүгэ үөрэх тэрилтэлэрин икки ардыларыгар сибээһи күүһүрдүөххэ наадатын эттилэр. Ону сэргэ, спорка, ыччакка аналлаах тэрээһиннэри ыытарга сөбүлэстилэр.
Көрсүһүүгэ Саха сирэ “Хоккайдо Корпорэйшн” хампаанньаны кытары кыттыгас бырайыагын, “Саюри” сылы эргиччи үлэлиир тэпилииссэ, туһунан кэпсэтии ураты миэстэни ылла. Бырайыак, былаан быһыытынан, 2019 сыл олунньутугар иккис уочаратын үлэҕэ киллэриэхтээх. Онон манна былааннара киэҥ. Бу тутууну таһынан, Япония хампаанньата быйыл биһиэхэ кэлэн медицинаҕа туһаныллыбыт бөҕү уматыыга анал оһоҕу туруорбута. Бу оһох сылга 500 тоннаҕа тиийэ бөҕү уматар кыамталаах. Мантан сиэттэрэн хампаанньа салгыы бөҕү хомуйууга ылсар санаалаах. Санатан эттэххэ, билигин аҥаардас Дьокуускай куоракка күннэтэ 470 тонна бөх тоҕуллар.
Айсен Николаев бу көрсүһүүнү таһынан Хоккайдо баан салалтатын, РФ генеральнай консула Андрей Фабричниковы кытары көрүстэ. Бүгүн Саха сирин дэлэгээссийэтэ Токиоҕа Инвестиционнай семинарга кыттыыны ылыаҕа. Манна өрөспүүбүлүкэбит инвестиционнай бырайыактарын кэпсиэхтэрэ.

Аграфена КУЗЬМИНА, “Саха сирэ” хаһыат.

#бүгүн: 1
0
0

Сайт матырыйаалларын ааптар көҥүлэ суох ылар бобуллар.