Бүгүн Ил Дархан Айсен Николаев СӨ бырабыыталыстыбатын саҥа састаабын кытары бастакы мунньаҕын ыытта.
Айсен Сергеевич мунньах кэмигэр бырабыыталыстыба инники үлэтин хайысхаларын ыйда. Бастакы уочарат, кыстыкка бэлэмнэнии үлэтин уталыппакка бириэмэтигэр ыытан иһиэххэ наадатын, кэлэр сыллааҕы бүддьүөт сокуонун бырайыагар күүскэ үлэлэһэргэ эттэ. Ону таһынан, хаарбах дьиэттэн дьону көһөрүү бырагырааматын түмүктүүр үлэлэрин көрөргө сорудахтаата.
Бырабыыталыстыба биир сүрүн үлэтинэн РФ бэрэсидьиэнэ Владимир Путин ыам ыйыгар таһаарбыт национальнай бырайыактарын олоххо киллэрии буолуоҕа. Ону сэргэ, Уһук Илин эрэгийиэннэр 2025 сылга диэри сайдыыларын национальнай бырагырааматын оҥорсууга ылсыахтара. Былаан быһыытынан, бу бырагыраама эһиил балаҕан ыйыгар бэлэм буолуохтаах. Туһааннаах министиэристибэлэр, биэдэмистибэлэр РФ бэрэсидьиэнигэр Бастайааннай бэрэстэбиитэлистибэлэрин кытары үлэлэһиэхтэрэ.
Аграфена КУЗЬМИНА, edersaas.ru