Айсен Николаев Япония миниистирин кытта Өлүөнэ муостатын туһунан кэпсэттэ
Саха сирэ Японияны кытары үлэлэһэн, хас да бырайыагы олоххо киллэрдэ. Салгыы өссө да киэҥ былааннардаах. Бу туһунан Ил Дархан Айсен Николаев Японияҕа командировкатын кэмигэр экономика, бырамыысыланнас уонна атыы миниистирин, Арассыыйаны кытары үлэлэһэр миниистири Хиросигэ Сэконы кытары көрсөн кэпсэттэ.
Быйыл сайын Япония улахан дэлэгээссийэтэ Саха сиригэр кэлэ сылдьан Арассыыйа уонна Япония бииргэ үлэлээһиннэригэр киэҥ хабааннаах мунньаҕы ыыппыттара. Биһиги өрөспүүбүлүкэбитигэр кыттыгас бырайыактарын туһунан кэпсэппиттэрэ. Онно Хиросигэ Сэко бэйэтинэн кэлэ сылдьыбыта уонна Саха сирин дэлэгээссийэтин Японияҕа ыҥырбыта.
Японияны кытары кыттыгас бырайыактарбытыттан ааттаталаатахха, быйыл Булуҥ улууһугар Тиксиигэ тыал күүһүн туһанар улахан комплекс үлэҕэ киирдэ. Оҕуруот аһын сылы эргиччи үүннэрэр тэпилииссэ эһиил үһүс түһүмэҕэ бүтүөхтээх. Оччотугар Дьокуускай куорат олохтоохторо кыһыннары сибиэһэй оҕурсунан, помидорунан хааччыллыахтаахтар. Ону сэргэ бөҕү уматыыга анал оһох туруорбуттара. Билигин бу оһоххо медицина эйгэтиттэн тахсыбыт араас хаалыыны уматаллар.
Кэпсэтии кэмигэр Айсен Сергеевич уонна Хиросигэ Сэко Өлүөнэ өрүһү туоруур муоста, Саха сирин инвестиционнай бырайыактарын туһунан кэпсэттилэр. Япония миниистирэ бу бырайыактары тус хонутуруолугар илдьэ сылдьара үөрдэр.
Бу көрсүһүүнү таһынан Саха сирин дэлэгээссийэтэ Япония хампаанньаларын кытары нэһилиэнньэлээх пууннары тупсарыы, бөҕү ыраастааһын, иккистээн туһаҕа таһаарыы, производствоҕа үрдүкү технологияны туһаныы, о.д.а. боппуруостары дьүүллэстилэр. Бэҕэһээ Ил Дархан Япония баанын бэрэссэдээтэлин Тадаси Маэданы кытары көрсүбүтэ. Манна тыа хаһаайыстыбатын боппуруостарын ырыппыттара.
Аграфена КУЗЬМИНА, “Саха сирэ” хаһыат, edersaas.ru