СИА сайтка Дьокуускай мэрин дуоһунаһыгар киирсэр Айсен Николаев быыбар туһунан санаатын маннык үллэһиннэ:
— Былырыыҥҥы Госдуума быыбарыгар курдук элбэх киһи куоластаата. Үгэс курдук, Саха сирэ Уһук Илиҥҥэ бастыҥ көрдөрүүлээх — дьон көхтөөхтүк кыттар. Быйыл биһиги быыбарбыт Арассыыйа субъегын киинин баһылыгын талар соҕотох быыбар буолар. Мин холкутук кыайыам диэн бигэ эрэллээхпин.
Дьокуускай бириэмэтинэн 23:00 чааска «Биир ньыгыл Арассыыйа» баартыйа генсэбиэтин сэкирэтээрэ Сергей Неверовтыын селекторнай мунньах буолла. Уһук Илин регионнар бары сибээскэ таҕыстылар.
Дьокуускайтан баартыйа регионнааҕы салаатын сэкирэтээрэ Александр Ноговицын, Дьокуускай мэригэр баартыйаттан кандидат Айсен Николаев, баартыйа Дьокуускайдааҕы салаатын сэкирэтээрэ Александр Саввинов уонна баартыйа регионнааҕы талар хамыыһыйатын салайааччы Дмитрий Никифоров кытыннылар.
«Биир ньыгыл Арассыыйа» баартыйа салалтатыгар өйөбүлгүт уонна эрэлгит иһин улаханнык махтанабын. Кыайдыбыт диэн бигэ эрэллээхпин«, — диэтэ Айсен Николаев.
Неверов Айсен Николаев уопуттаах баһылык буоларын бэлиэтээтэ:
— Быыбардааччылар төрөөбүт куораттарын эрэллээх киһиэхэ итэҕэйдилэр дии саныыбын. Агитациялыыр үлэҕит олус сонуннук уонна таһаарыылаахтык барда. Социальнай ситимҥэ күүскэ үлэлээтигит. Элбэх интэриэһинэй ньыманы тутуннугут.