Бэҕэһээ киэһэ Россия Федерациятын гражданской оборона дьыалатыгар, ыксаллаах быһыыга-майгыга уонна айылҕа быһылаанын содулун туоратыыга миниистирэ Евгений Зиничев уонна Ил Дархан э.т. Айсен Николаев Камчаткатааҕы Петропавловскайтан Дьокуускайга кэллилэр.
Күнүс кинилэр дойду премьер-миниистирэ Дмитрий Медведев салалтатынан ыытыллыбыт Уһук Илин уонна Байкал эрэгийиэннэрин сайыннарыыга Бырабыыталыстыба хамыыһыйатын мунньаҕар кыттыыны ылбыттара.
Евгений Зиничев уонна Айсен Николаев Дьокуускайга сааскы халааҥҥа ылларбыт улуустарга чөлүгэр түһэрэр үлэ хайдах баран иһэрин, эмсэҕэлээбиттэргэ биир кэмнээх көмөнү оҥоруу туругун итиэннэ ойуур баһаарын умулларыы уонна сэрэтии дьаһалларын тустарынан дьүүллэстилэр. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» edersaas.ru